Baqylaý beketterinen bólek kúdikke ilingen páterler men jeke úılerdi de tekserý jumystary júrgizilýde. Tıisti qurylymdar tintý barysynda jaryq dybystyq granatalar, tonalǵan turmystyq tehnıkalar, mobıldi qurylǵylar men sýyq qarýlardy tárkilegen. Qylmystyq jaýapkershilikke tartylǵandardyń sany sát saıyn jańarýda. Komendatýra keltirgen sońǵy derek boıynsha lańkestik, tonaý jáne basqa da isterge qatysy bar degen kúdikpen 1 237 adam ustalǵan. Odan bólek, 31 atys qarýy men 1 428 oq-dári tárkilenip, blok-beketterde taǵy da 38 adam qolǵa túsken. Jaýapty oryndar «102» basqarý pýltine barlyǵy 608 habarlama, komendatýranyń call-ortalyǵyna azamattardan jedel áreket etýdi talap etetin 253 dabyl túskenin málimdedi.
Máselen, Almaly aýdanynyń polısııa qyzmetkerleri Baıtursynuly kóshesindegi jaldamaly páterlerdiń birinen qalany talqandaýǵa qatysty dep kúdikke ilingen 8 adamdy ustady. «Turǵyn úıden áskerı quraldar men qala dúkenderinde qoldy bolǵan turmystyq, sıfrly tehnıkalar tabyldy. Ustalǵandardyń 6-aýy Jambyl oblysynyń, taǵy 2-eýi Taldyqorǵan qalasynyń turǵyny. Úlkeniniń jasy 25-te bolsa, eń kishisi nebári 19 jasta», dep málimdedi polısııadaǵylar.
Komendatýranyń aqparattyq bólimi qalada lańkesterge qarsy kúres áli de jalǵasyp jatqanyn, 11 qańtar kúngi derek boıynsha, Áýezov, Alataý jáne Medeý aýdandarynyń aýmaǵy, «О́jet» shaǵyn
aýdany men «Almaty» halyqaralyq áýejaıyna shekaralas aýmaqta lańkesterden tazartý jumystary qarqyndy júrgizilgenin habarlady. Buǵan deıin shahardyń Saıyn – Raıymbek – Karernaıa – Jandosov kósheleriniń aýmaǵy qylmyskerlerden tazartylǵany týraly aqparat taraǵan bolatyn.
Ákim Baqytjan Saǵyntaev oırannan eń kóp zardap shekken Almatynyń tynys-tirshiligin qalpyna keltirý boıynsha aqparattyq keńes ótkizip, megapolıs ómirin arnaǵa túsirýdiń josparyn tanystyrdy. Qala basshysy ákimdik ǵımaratynyń qıraýyna baılanysty qala ákimdigi ýaqytsha Almaly aýdany ákimdiginiń ǵımaratynda jumysyn jalǵastyratynyn aıtty. Tıisinshe zardap shekken qalalyq keńseler de basqa ǵımarattarǵa ýaqytsha kóshiriledi.
Búgin, ıaǵnı 12 qańtardan bastap Almatyda barlyq qoǵamdyq kólikter qalypty jumysyna kirisedi. Tótenshe jaǵdaıǵa baılanysty jumys kestesi qalalyq marshrýttar úshin saǵat 08.00-den 20.00-ge deıin jumys isteıdi.
Prezıdent tapsyrmasyna saı, jurt basyna bult úıirgen qandy oqıǵa endi qaıtalanbas úshin kún sanap aýmaǵy artqan shahardaǵy qaýipsizdik máselesi barynsha kúsheıe túspek. Almaty qalalyq polısııa departamentiniń basshysy ári qala komendanty Qanat Taımerdenov jaǵdaıdyń tolyq baqylaýda ekenin jetkizdi. Dúıim eldi dúrliktirgen dúrbeleńde beıbit turǵyndarmen qatar quqyq qorǵaý salasynyń qyzmetkerleri qatty zardap shekti. Qalanyń bas polıseıi qyzmet babynda qaza bolǵan polıseılerdiń úıine baryp, kóńil aıtty. Buǵan deıin habarlaǵanymyzdaı, polısııa serjanty Alen Asylhanov, polısııa starshınasy Rınat Qambetov pen polısııa kishi serjanty Nurbolsyn Almasov qalany qorǵaý barysynda lańkesterdiń qolynan qaza tapqan bolatyn.
«Elimizge syn saǵat tóngende erlikpen ómirden ótken áriptesterimizdiń týystarymen birge qaıǵyramyz. Olar azamattardyń qaýipsizdigi úshin janyn qıǵan batyrlar. Azamattardyń Otan aldyndaǵy janqııarlyq qyzmeti bizge de, bolashaq urpaqqa da jarqyn úlgi bolmaq», deıdi Qanat Taımerdenov.
Sondaı-aq qala komendanty turǵyndardy saq bolýǵa shaqyryp, balalar men egde adamdardy qaraýsyz qaldyrmaý jaıyn eskertti. Báleniń beti beri qarady desek te, arqany keńge salýǵa erte, sondyqtan muqııat bolǵan abzal.
ALMATY
