Elordadaǵy Ulttyq akademııalyq kitaphanada Halyqaralyq «Altyn Qyran» qaıyrymdylyq qorynyń demeýshiligimen jaryq kórgen jas qalamgerler kitaptarynyń tusaýkeser rásimi bolyp ótti.
Ádebıet pen mádenıetke qal-qaderinshe qamqorlyq tanytyp kele jatqan halyqaralyq «Altyn Qyran» kompanııalar toby 2012 jyly alty birdeı jas qalamgerdiń kitabyn jaryqqa shyǵarǵan bolsa, 2013 jyly qadirmendi qalamger Ábdijámil Nurpeıisovtiń «Qan men ter» jáne «Sońǵy paryz» kitaptarynyń aǵylshyn tiline aýdarylýyna demeýshilik jasaǵan edi.
Endi, mine, sol ıgilikti shara taǵy da jalǵasyn taýyp, qaıyrymdylyq qory bıylǵy jyly jeti qalamgerdiń shyǵarmalaryn jeke kitap etip oqyrmanǵa usynypty. Buǵan deıin «Aına» jyr jınaǵyn oqyrmanǵa usynǵan Beıbit Sarybaıdyń «Meıirim» atty áńgimeler kitabyna sońǵy jyldary jazǵan týyndylary engizilipti. Áńgimelerinde balalyq shaqtyń móp-móldir sezimin, adam men qoǵam, adam men tabıǵat arasyndaǵy qaqtyǵystardy shynaıy sýretteıtin jazýshynyń adamdar psıhologııasyn sheber ıgergeni ańǵarylady. Qaıshylyqty qoǵam turǵyndarynyń minez-qulqy, qalpy, adamı qarym-qatynasy esh ásireleýsiz, qaz-qalpynda baıandalady. «Shabyt» shyǵarmashylyq jastar festıvaliniń laýreaty, respýblıkalyq músháıralardyń jeńimpazy Álııa Dáýletbaevanyń «Sol bir sáýle» jınaǵyna bir top óleńderi men «Aı astynda bir kól bar...» atty poemasy engizilipti. Al birneshe jyr músháıralarynyń jeńimpazy Janar Ábsadyqtyń «Sezimder maýsymy» óleńder jınaǵyna albyrt shaqtyń ádemi óleńderi toptastyrylypty.
Taıaýda ǵana «Egemen Qazaqstan» gazetiniń Shyǵys Qazaqstan oblysyndaǵy menshikti tilshisi qyzmetine kirisken Dýman Anashtyń «Áýlet» pýblısıstıkalyq tuńǵysh kitabynda ultymyzdyń ótken ǵasyrdyń alǵashqy shıreginde bastan ótkergen qıly aýyrtpalyqtary sóz bolady. Ásirese, uly hakim Abaı men Alash kósemi Álıhan Bókeıhanuly urpaqtarynyń taǵdyry beıjaı qaldyrmaıdy. Áýlet qasireti arqyly ulttyń basynan keshirgen zobalańy belgili ǵalymdardyń, jazýshylardyń keltirgen derekteri men dáıekteri negizinde baıandalady. Belgili karıkatýrashy, birneshe halyqaralyq konkýrstardyń júldegeri Ǵalym Smaǵululynyń sýretti-albom jınaǵyna sýretshiniń tańdaýly 100-ge jýyq týyndysy toptastyrylypty. Ǵalymnyń taqyryp tańdaýda talǵamynyń joǵary ekenin kitapty paraqtap otyryp baıqaýǵa bolady. Onyń ár shyǵarmasy boıamasyz dál beınelengen. Baıyppen qaraǵan jan qoǵam kórinisin sýretterden jazbaı tanıdy. Talantty aqyn, birneshe jyr dodalarynyń júldegeri Qýanysh Medeýbaevtyń «Qara jáshik» atty dúnıesi aqyn janynyń aınasy ispetti bolsa, «Daryn» Memlekettik jastar syılyǵynyń laýreaty Azamat Tasqaraulynyń «Jýsan qyz» kitabyna aqynnyń lırıkalyq-fılosofııalyq óleńderi enipti. Aıdynǵa qanat qaqqan jeti jelken dep, jeti qalamgerdiń áli sııasy kebe qoımaǵan rýhanı qundylyqtary ult úshin abyroıly is dep bilemiz.
Tusaýkeser rásimine oraı ótkizilgen baspasóz máslıhatynda akademık Seıit Qasqabasov, aqyn-jazýshylar Ákim Tarazı, Nurlan Orazalın, Aldan Smaıyl, Serik Aqsuńqaruly, Bıgeldi Ǵabdýllın, Janarbek Áshimjan, Dáýren Berikqajyuly men sýretshi Aıdarbek Ǵazızuly sııaqty qoǵam qaıratkerleri men belgili aqyn-jazýshylar sóz alyp, jelken qaqqan jeti qalamgerge qamqorlyq kórsetip otyrǵan kompanııa ujymyna alǵystaryn bildirdi. Kitaby jaryq kórip otyrǵan jas qalamgerlerdiń shyǵarmashylyǵyna toqtalyp, óz oı-pikirlerin ortaǵa salyp, jazar kóbeısin degen tilekterin jetkizdi.
Berik SADYR,
«Egemen Qazaqstan».
–––––––––––––––––––––
Sýretterdi túsirgen
Erlan OMAROV.
