Oblystyq densaýlyq saqtaý basqarmasynyń baspasóz qyzmetinen málim etkendeı, bıylǵy 3 qańtardan beri qaýipti vırýsty juqtyrýshylar qatary kóbeıgen. Máselen, 3 qańtarda – 20, 6 qańtarda – 22, 8 qańtarda – 33, 9 qańtarda – 42, 10 qańtarda – 97 adamnyń Covid-19 ınfeksııasyn juqtyrǵany anyqtalǵan. Al 11 qańtarda 139 adam Covid-19 ınfeksııasyna shaldyqty.
– Qaýipti vırýsty juqtyrý deregi ásirese, Atyraý qalasynda kóbeıip otyr. Shaharda 11 qańtarda Covid-19 ınfeksııasyn juqtyrýdyń 110 jaǵdaıy rastaldy. Jylyoı aýdanyndaǵy Teńiz ken ornynda 29 naýqas shaldyqty. Koronavırýs ınfeksııasy sımptomdy belgisi 77 naýqasta bar, – dep habarlady basqarmanyń baspasóz qyzmeti.
Qazir koronavırýs ınfeksııasyn juqtyrǵan 190 adam úı jaǵdaıynda emdelip jatyr. Al modýldik aýrýhanada – 142, Teńiz ken ornyndaǵy ınfeksııalyq stasıonarda – 126, aýdandardaǵy stasıonarlarda 17 naýqas oqshaýlanǵan. О́ńirdegi ınfeksııalyq stasıonarlarda 580 tósektik oryn bar. Stasıonarlarda qaýipti vırýsqa shaldyqqan 285 naýqas emdelip jatyr. Mundaǵy júkteme – 49,1%. Infeksııalyq stasıonarlardyń 58 orynǵa eseptelgen jansaqtaý bóliminde jatqan 8 naýqastyń jaǵdaıy nasharlady. Jaǵdaıy óte aýyr bir pasıent ókpeni jasandy jeldetý apparatyna qosylǵan. Bul bólimdegi júkteme 15,5%-dy quraıdy.
Dárigerlerdiń aıtýyna qaraǵanda, qaýipti vırýsty tejeýdiń bir ǵana joly bar. Bul – vaksına saldyrý. Sol sebepten óńir turǵyndaryna vaksınanyń mańyzy týraly aqparattyq túsindirý jumysy qaıta qolǵa alyndy. Qazir Atyraý oblysynda koronavırýs ınfeksııasyna qarsy salynatyn vaksınanyń tórt túri bar. Oblystyq densaýlyq saqtaý basqarmasy baspasóz qyzmeti taratqan aqparatqa súıensek, byltyrǵy 1 aqpannan beri vaksınalardyń I komponentin 259 970 adam saldyrypty. Al vaksınalardyń II komponentin ektirgenderdiń sany 242 704 adamǵa jetken.
– Atyraý oblysyndaǵy ekpe beketterinde koronavırýs ınfeksııasyna qarsy salynatyn 4 vaksınanyń qory jetkilikti. Máselen, QazVac vaksınasy ekpe saldyratyn beketterdiń bárinde bar. Al VeroCell vaksınasyn Atyraý qalasyndaǵy №2, 3, 5 jáne Geolog, Erkinqala eldi mekenderinde emhanalarda, sondaı-aq temir jol aýrýhanasy men «MedıkerJaıyq» mekemesinde alýǵa bolady. Bul vaksınanyń qory Qyzylqoǵa aýdanynda da jetkilikti deı alamyz. Spýtnık-V vaksınasy Atyraý qalasynyń №1, 2, 3, 4, 5, 7 jáne Geolog eldi mekenindegi ekpe beketinde bar. Mahambet jáne Qurmanǵazy aýdanyndaǵy ekpe beketteri atalǵan vaksınanyń jetkilikti dozasymen qamtyldy, – dep málim etti basqarmanyń baspasóz qyzmeti.
Munaıly óńirge byltyr 19 qarashada Pfizer vaksınasynyń eki komponentine arnalǵan 32 760 dozasy jetkizilgen edi. 12 men 18 jas aralyǵyndaǵy balalar sany 63 138 adamdy quraıdy. Al bala emizetin jáne júkti áıelder sany – 35 362. Byltyr 20 qarashada vaksınany jasóspirimder men analarǵa salý bastaldy. Sodan beri Pfizer vaksınasyn 3 120 adam saldyrdy. Onyń ishinde bala emizip otyrǵan 1 558 ana men 164 júkti áıel bar. Sondaı-aq 12-18 jas aralyǵyndaǵy 1 398 jasóspirim atalǵan vaksınany alǵan.
Atyraý oblysy
