Bıyl Jetisaı aýdany boıynsha 78 500 gektar aýmaqqa egis egý josparlanyp otyr. Sonyń ishinde myń gektarǵa erte pisetin qyryqqabat egilmek. Jerdi jalǵa alyp otyrǵan sharýanyń biri Sapar Úsenov: «Kún-tún demeı qarasha aıynan bastap jylyjaıǵa erte pisetin «Pandıon» jáne «Zarısma» kóshetterin óndirýdi bastaǵanbyz. Daıyn bolǵan kóshetterdi 5 gektar aýmaqqa otyrǵyzdyq. Byltyr osy jerden 300 tonna ónim aldyq. Ol ónimdi kórshiles elderge jiberemiz. Byltyr ónim ózin ózi aqtady», deıdi.
О́tken jyly Jetisaı aýdanynda 1 097 gektarǵa qyryqqabat egilip, 38 myń tonna ónim jınalǵan. Erte pisetin ónimder óńirde azyq-túlik baǵasyn turaqtandyrýǵa da septigin tıgizýde. Bul oraıda Memleket basshysy Qasym-Jomart Toqaevtyń tapsyrmasymen oblysta áleýmettik mańyzy bar taýarlar baǵasy turaqty baqylaýda ekenin aıta ketelik. Túrkistan qalasynda 11 qańtardaǵy jaǵdaı boıynsha áleýmettik mańyzy bar azyq-túlik taýarlarynyń baǵa ındeksi 0,4%-ǵa tómendedi. Oblys ákimdiginiń málimetinshe, jumyrtqa men sábiz baǵasy arzandaǵan. Qalǵan 15 taýar (nan, qartop, kúrish, kúnbaǵys maıy, qaraqumyq, aıran, súzbe, qyryqqabat, sıyr eti, taýyq eti, qumsheker, tuz, sary maı, pııaz, makaron) boıynsha jaǵdaı turaqty. Oblystyń aýdan, qala ákimdikteriniń qoldaýymen merekelik jáne demalys kúnderi kóshpeli saýda júrgizilip, halyqqa 26,5 mln teńgege 57 tonna taýar satylǵan. Áleýmettik mańyzy bar azyq-túlik taýarlarynyń baǵasyn retteý tapsyrmasyna sáıkes «Aınalym shemasy» sheńberinde taýar óndirýshilerge jalpy 640 mln teńge berildi. Sonymen qosa turaqtandyrý qory esebinde 255,7 mln teńge ornalastyrylǵan. Nátıjesinde, Magnum Cash&Carry, «Alı Saýda», «Ǵajaıyp-P», «Saıram sút» JShS men saýda oryndary taýarlardy naryqtaǵy baǵadan 10-15%-ǵa tómen baǵamen satýda. Budan basqa Túrkistan qalasynda fılıaly bar Magnum cash&Carry saýda jelisimen áleýmettik mańyzy bar azyq-túlik taýarlaryna saýda ústemesin 15%-dan 10%-ǵa deıin tómendetý týraly monopolııaǵa qarsy komplaens aktisi qabyldandy.
Sondaı-aq áleýmettik mańyzy bar azyq-túlik taýarlary baǵasynyń negizsiz ósýiniń aldyn alý maqsatynda iri saýda oryndary men dúkender jáne ámbebap bazarlarmen bıylǵy 9 qańtardaǵy jaǵdaı boıynsha oblys kóleminde 1 098 memorandým túzilgen. Aýdan, qalalardaǵy mobıldik toptar áleýmettik mańyzdy taýarlar boıynsha naqty jumystar júrgizýde. Túrkistan qalasy boıynsha áleýmettik mańyzy bar azyq-túlik taýarlarynyń 19 túrinen keminde 1-1,5 aıǵa jetetin qor jasaqtalǵan. Basqa qala, aýdandarda da osy kólemde qor bar.
Túrkistan oblysy
