«Teńizshevroıl» JShS ıgerip jatqan bul ken ornynyń álemde balamasy joq. Qazir ken ornynda eki jobany iske asyrý aıaqtalýǵa taıaldy. Onyń biri – keleshek keńeıý, ekinshisi – uńǵy erneýindegi qysymdy basqarý jobasy. Bul jobalar iske qosylǵanda «Teńizden» alynatyn «qara altyn» kólemi 12 mln tonnaǵa artyp, jylyna 39 mln tonnaǵa jetedi.
«Memleket basshysy Qasym-Jomart Toqaevtyń tapsyrmasyna sáıkes, Atyraý óńirindegi ekonomıkalyq ári strategııalyq mańyzdy iri ónerkásip oryndaryna áskerı kúzet qoıyldy. Onyń ishinde «Teńiz» ken orny da bar. Bul kenishtegi óndiris oryndaryn Qazaqstannyń Qarýly kúshteriniń áskerıleri men oblystyq polısııa departamentiniń qyzmetkerleri «Teńizshevroıl» kompanııasynyń kúzet qyzmeti ókilderimen birlese kúzetip tur. Olardyń arasynda Ujymdyq qaýipsizdik týraly shart uıymynyń (UQShU) áskerleri joq» dep habarlady oblys ákiminiń baspasóz qyzmeti.
Munaıly shaharǵa tórt baǵyttan kiretin avtokólik jolyna qoıylǵan blok-beketterde júrgizýshiler men jolaýshylar, kóliktiń júk salǵyshy jiti tekserilip jatyr. Tótenshe jaǵdaı engizilgennen beri komendanttyq saǵat talaby 78 ret buzylǵany belgili boldy. Máselen, 9 qańtarǵa qaraǵan túni Atyraý qalasynda túngi mezgilde jumys istep turǵan úsh azyq-túlik dúkeniniń jumysy toqtatyldy.
Oblystyq aýrýhananyń bas dárigeri Erbol Imanǵalıevtiń málimetine súıensek, jappaı tártipsizdikten keıin dárigerlerge túrli jaraqat alǵan 62 adam júgingen. Qazir 7 adam aýrýhanada jatyr. Onyń ishinde 5 naýqastyń jaǵdaıy turaqty, al quqyq qorǵaý organynda jumys isteıtin 2 qyzmetkerdiń hali ortasha aýyr dep baǵalanyp otyr.
Al Atyraý magıstraldyq jeli bólimshesiniń dırektory Elýbaı Saparovtyń málimetine súıensek, jergilikti temirjolshylar qan qoryn molaıtýdy uıǵardy. «Elimizde bolǵan jappaı tártipsizdikten quqyq qorǵaý organdary men áskerılerdiń qaza tapqany janymyzǵa batyp otyr. Zardap shekkender de az emes. О́ńirdegi temir jol salasynda jumys isteıtin 2 myńǵa jýyq temirjolshy jaraqat alǵandardy qoldaý úshin qan tapsyrýǵa uıǵarym jasady. Aldymen 70-ke jýyq temirjolshy jappaı tártipsizdikten zardap shekkender úshin qan tapsyrdy», dep málim etti ol.
Atyraý oblysy
