Tilge jetik, dástúrge adal

«Túsi ıgiden túńilme» deıdi qazaq. Biz áńgime etkeli otyrǵan Oıyl aýdandyq telekommýnıkasııa torabynyń dırektory Natalıa Tambovseva osyndaı jan eken. Buryn-sońdy tanystyǵymyz bolmasa da jyly jymıyp qarsy alǵan ol aman-saýlyqtan soń ózi týraly az-kem áńgimelesýge kelisimin berdi. Suhbattasymyz jaıdary jan bolyp shyqty. Ázilge qaljyńmen til qatyp, esesin jiberer emes. Qazaqshasy da bir qazaqty súrindirgendeı. Keıbireýlerdeı bildeı bir mekemeni basqaryp otyrmyn dep kisimsý joq, qarapaıym. «Teatr kıimilgishten bas­talady» degendeı, shaǵyn meke­meniń aınalasy da, ishi-syrty da muntazdaı taza. Keńse ishin­de de usynaqty qoldyń izi ań­ǵarylady. Natalıanyń ózi otyratyn bólmeni beıne gúl baǵy deýge bolar, asyryńqyrap aıt­qanda. Úı jaǵdaıynda ósi­riletin alýan gúldiń jupar ıisi ańqıdy. Qaptaǵan gúldiń ortasynda otyrǵan odan qandaı gúldi aıryqsha unatasyz degen suraýdyń reti kelip qaldy. «Barlyq gúldi unatamyn, alaıda, «Orhıdeıa» janyma jaqynyraq», dedi kúlimsireı. Natalıa osy Oıyldyń topy­raǵynda týyp-ósken eken. Ákesi Nıkolaı Tımofeevıch pen anasy Valentına Aleksandrovna da Oıylda turyp jatyr. Son­dyqtan da, qazaqshasy jatyq, izettiligi kórinip tur. Oıylda orta mektep bitirgennen keıin Aqtóbe baılanys kolledjin qyzyl dıplommen támamdap, týǵan jerine oralyp, qazir ózi basqaryp otyr­ǵan mekemege jumysqa turady. Bilimi men biligi qatar órilgen jas maman kóp uzamaı-aq ózin jaqsy qyrynan kórsetip, áriptesteri arasynda bedelge ıe bolady. Eki jyldan keıin ózi jumys isteıtin Oıyl telekommýnıkasııa toraby dırektorlyǵyna joǵarylatylady. О́z isin jetik biletin jáne adamdarmen ortaq til tabysa alatyn ol tez arada basshylyq qyz­mette de bi­lik­tiligin tanytty. Qazaqtyń kólik akademııasynda oqyp, bilimin jetildirdi. Qazir munda otyzǵa jýyq adam eńbek etedi. Barlyq eldi mekendermen telefon baılanysy bar. Basqa da baılanys qyzmetteri jolǵa qoıylǵan. Telehabarlar kórmeıtin eldi meken joq. Oıyl telekommýnıksııa torabynda qalyptasqan ujymdyq óndiristik jáne eńbek dástúrin damyta otyryp, óz áriptesteri arasynda aldyńǵy lekten kó­­rinse, onda basshy kelinshek Natalıa Tambovsevanyń da úle­­si bar. Tutynýshylardyń kó­ńilinen shyǵatyndaı baılanys qyzmetin usynyp otyrǵan me­kemeniń yrǵaqty jumysyn qamtamasyz etýmen birge qo­ǵam­dyq jumystardyń da ortasynda júredi. Memleketik tildiń kósegesin kógertý, qolda­nys aıasyn keńeıtýge baılanysty is-sharalarǵa qatysady. О́ziniń qazaq tilin qanshalyqty meńgergenin ózgelerge úlgi ete­di. Oblystyq telekommýnıkasııa qyzmetkerleri arasynda uıymdastyrylǵan «Memleketik til» baıqaýynda ekinshi oryn aldy. Almatyda ótken sala boıynsha «Ana tili – memlekettiń tiregi» atty respýblıkalyq baı­qa­ýyna qatysty. Qazaq ánderin na­qyshyna keltire shyrqaıtyny da bar. – Men – qazaqtyń kelinimin. Jubaıym Amangeldi Nurbaev – qoryqshy. О́zi biryńǵaı qazaq turatyn Yrǵyzdyń jigiti. Oıylda óskendikten, men de jergilikti halyqpen bite qaınasyp kelemin. Sondyqtan úıde meılinshe qazaqy salt-dástúrdi ustanamyz. Jeti nan pisiremin, basqa da ulttyq taǵamdardy daıyndaımyn. О́z ul­tymnyń da ádet-ǵurpyn bilemin. Kóp bilgenniń artyqtyǵy joq. Jeti jasar qyzymyz bar, – deıdi Natalıa Tambovseva kelinimiz. Mine, úıdiń de, túzdiń de sha­r­ýa­­­­­­syn kelistirip otyrǵan osyndaı kelinderdiń qatary kóbeıe bersin dep tiledik biz. «Jaqsyda jattyq joq» degen osy. Satybaldy SÁÝIRBAI, «Egemen Qazaqstan». Aqtóbe oblysy.