Joǵalǵan «Boıngtiń» qupııalary birtindep ashylyp jatyr

Budan alty kún buryn Ońtústik Qytaı teńizi aýmaǵynda izim-qaıym joq bolyp ketken Malaızııa áýe kompanııasynyń Boeing 777-200 ushaǵy apatqa ushyraǵan bolýy da múmkin. Bul týraly ITAR-TASS habarlady. Agenttik tilshisiniń málimetinshe, Vetnam jaǵalaýynda ornalasqan munaı kompanııalarynyń biriniń qyzmetkeri Maıkl Djerom Makkeı qulap bara jatqan ushaqty kórgen eken. Ol osyǵan baılanysty Malaızııa úkimetine elektrondy hat joldap, óziniń kórgenderin baıandap beripti. Kýáger laınerdiń áýede jartylaı janyp qulaǵanyn jazady. Áýe kemesi bar-joǵy 10-15 sekýndta janyp ketken. Qazir bul versııa da tekserilip jatyr. Eske sala keteıik, naýryzdyń 8-i kúni Malaızııanyń astanasy Kýala-Lýmpýrdan ushyp Qytaıdyń ortalyǵy – Beıjińdi betke alǵan Boeing 777-200 ushaǵy áýege kóterilgennen keıin 19-mınýtta kenet joǵalyp ketken. Ushaqtyń bortynda 227 jolaýshymen birge 12 ekıpaj múshesi bolǵan. Jolaýshylar arasynda 14 eldiń azamaty bar. Izdeý operasııasy áli jalǵasýda. Oǵan Indonezııa, Avstralııa, Qytaı, Taıland, Sıngapýr, Vetnam, AQSh, Úndistan jáne Japonııa qutqarýshylary atsalysýda. Qazir buǵan 35 ushaq, 42 keme qosylǵan. Degenmen, qazir joǵalǵan ushaqtyń taǵdyry týraly boljamdar kóp. Mysaly, ótken aptada Qytaı spýtnıginiń ushaqtyń qulaǵan jerin anyqtaǵany jetkizildi. Qytaı mamandarynyń aıtýlarynsha, túsirilgen sýretterden teńizde qalqyp júrgen úsh nysannyń sulbasy anyq kórinedi. Bulardyń laınerdiń bólshekteri bolýy ábden múmkin. Taǵy bir boljam boıynsha, ushaq radarǵa kórinbeı ketkennen keıin 4 saǵat ýaqyt aspanda qalyqtap júrgen. Muny habarlaǵan The Wall Street Journal basylymy oqıǵany zertteýge qatysqan amerıkalyq sarapshylarǵa silteme jasaıdy. Sarapshylar avıalaınerdiń qozǵaltqysh júıesi avtomatty túrde jerge jiberip otyrǵan aqparattarǵa súıenip, osyndaı toqtamǵa kelgen. Atalmysh aqparattardyń arasynda ushaq qozǵaltqyshynyń jumysy, ornalasqan jeri men jyldamdyǵy týraly da málimetter kezdesedi. Mundaı biregeı qondyrǵy ushaqtyń qozǵaltqyshyna Malaysia Airlines kompanııasy men Rolls-Royce konserni arasynda bekitilgen kelisim-shart aıasynda ornatylǵan eken. Qazirgi ýaqytta mamandar Boeing 777-200 laıneriniń ushý traektorııasyn anyqtaý úshin datchıktiń kórsetkishterin jiti zertteýge kiristi. Eger datchıktiń málimetteri durys bolsa, radardan joǵalyp ketken ushaq taǵy da 4 myń shaqyrym qashyqtyqty ushyp ótip, Pákstanǵa jetýi múmkin, tipti Úndi muhıty ne Arabııa teńizine shyǵyp ketýi yqtımal. Eger bul boljam rastalsa, áýe kemesin izdestirý jumystary odan beter kúrdelenetin túri bar, deıdi sarapshylar. Mamandar laınerdi lańkester aıdap áketti degen boljamdy joqqa shyǵarmaıdy. Alaıda, onyń dittegen jerine jetkeni nemese apatqa ushyraǵany týraly naqty málimet joq. Bir qyzyǵy, sarapshylar apat ushqyshtyń qateliginen bolýy múmkin degen boljamdy múlde qarastyrmaǵan. Sáken Maılybaı. Derekkóz: ITAR-TASS. Foto: ITAR-TASS.