17 qańtarda óńirdiń bas sanıtarlyq dárigeriniń kezekti qaýlysy shyqty. Oblystyń «qyzyl aımaqqa» ótýine baılanysty osy kúnnen bastap, oblystyń bilim berý obektileri óz qyzmetin jańa jumys rejiminde jalǵastyratyn bolady. Sanıtarlyq-epıdemıologııalyq baqylaý departamenti basshysynyń orynbasary Ǵalymbek Alınniń aıtýynsha, vaksınalaýdyń tolyq kýrsyn aıaqtaǵan 9, 11-synyptar – shtattyq formatta, al qalǵan oqýshylar qashyqtan oqytýǵa kóshiriledi. Synypta koronavırýstyń bir jaǵdaıy tirkelse, synyp túgeldeı 14 kún úı karantınine oqshaýlanady.
– Kolledjder men joǵary oqý oryndarynyń stýdentteri úshin aralas oqý formaty bekitilgen. Iаǵnı dárister onlaın formatta, al tájirıbelik, zerthanalyq, semınarlyq sabaqtar shtattyq rejimde júrgiziledi. Oqý orny ákimshiliginiń sheshimi boıynsha vaksınalaýdyń tolyq kýrsyn aıaqtaǵan stýdentterdi shtattyq rejimde oqytýǵa ruqsat beriledi, – deıdi Ǵ.Alın.
Engizilgen shekteýler eldegi jáne oblystaǵy epıdemııalyq jaǵdaıdy turaqtandyrýǵa, aýrýlar sanyn azaıtýǵa, neǵurlym qatań shekteý sharalaryn engizýge jol bermeýge baǵyttalǵany belgili.
Sóıtip, Ashyq jobasyna qaramastan birqatar nysannyń qyzmetine tyıym salyndy. Atap aıtsaq, 20 qańtardan bastap, konsert zaldarynyń, teatrlardyń, sırkterdiń, fılarmonııalardyń qyzmeti toqtatyldy. Dinı nysandarda, ujymdyq is-sharalar ótkizýge tyıym salynady. Sonymen qatar konferensııa, semınar, kórme, forým ótkizýge de bolmaıdy. Túngi klýbtardyń qyzmeti de toqtaıdy. Al jeke kezdesýlerge keler bolsaq, vaksınalanǵan 10 adamǵa deıin ruqsat berilgen. Ashyq jobasynda «jasyl» mártebesi bar azamattar sporttyq-saýyqtyrý ortalyqtaryna, fıtnes-ortalyqtarǵa, ıoga-ortalyqtarǵa, monshalarǵa, saýnalarǵa, basseınderge kire alady.
Indettiń taralýyna tosqaýyl bolý úshin oblystaǵy «Aýyl», «Ýba», «Baqty», «Maıqapshaǵaı» avtojoldaryna 4 sanıtarlyq beket qoıylatyny habarlandy. Bul shara oblystyń bas memlekettik sanıtarlyq dárigeri jarııalaǵan qaýly boıynsha iske asyrylady. Qaýlyda «Bas memlekettik sanıtarlyq dárigeriniń qaýlysymen bekitilgen «Memlekettik shekarasy arqyly ótkizý pýnktterinen temir jol, teńiz, ózen kóliginde jáne avtoótpe joldarynda keletin adamdarǵa qatysty shekteý sharalaryna sáıkes Qazaqstannyń memlekettik shekarasy arqyly avtoótpe joldaryna «Aýyl», «Ýba», «Baqty», «Maıqapshaǵaı» (Borodýlıha, Zaısan, Shemonaıha, Úrjar aýdandary boıynsha 1 birlikten) ótkizý pýnkterinde 4 sanıtarlyq bekettiń jumys isteýin qamtamasyz etsin» dep jazylǵan.
Aıta ketsek, qaýly 2022 jylǵy 17 qańtardan bastap kúshine enedi jáne onyń resmı kúshi joıylǵanǵa deıin qoldanylady. «Qyzyl aımaq» boıynsha kózdelgen nysandardyń qyzmetin shekteý sharalary 2022 jylǵy 20 qańtardan bastap Shyǵys Qazaqstan oblysynyń barlyq aýmaǵynda qoldanyla bastaıdy.
Shyǵys Qazaqstan oblysy
