Mańǵystaýdaǵy amal merekesi

Ulys kúniniń ulylyǵyn kórsetti

«Assalaýmaǵaleıkým, Aı! Aı kórdim, aman kórdim, burynǵydaı zaman kórdim, eski aıda esirkeı gór, jańa aıda jarylqaı gór!» dep árbir jańa týǵan aıǵa amandasatyn halqymyz, naýryz aıynyń jańarýyn ózgeshe qarsy alady. Naýryzdyń 14-i kúni elimizdiń batys óńirindegiler «Kórisý» merekesin bastap ketedi. Ony mańǵystaýlyqtar «amal» dep ataıdy. Derek kózderi bul meıramnyń shyǵý tórkinin baǵzy zamandardaǵy aspan álemin zerdeleýshi juldyzshylardyń ilimine negizdeıdi. Amal juldyzy men Kúnniń bir túzý boıynda ózara júzdesip, kórisip turǵandaı beınede bolýy – sharýa baqqan, jerdegi tirligin kóktegi juldyzdar álemimen baılanystyra qaraǵan ata-babalarymyz úshin qystyń aıaqtalyp, kóktemniń bastalýy bolyp tabylǵan. Amal men Kún tárizdi bop qol alysyp, kókirek túıistire amandasýdyń mazmuny osynda jatsa kerek. Kórisý dástúrine Mańǵystaýda keshegi «Asyldarymyzdy shań bas­ty, barymyzdy jarqyrata jarata almadyq» deıtin keńestik kezeńniń ózinde qylaý túsken joq. Sol baıaǵy mańyzdy, me­re­keli kúıinde jyljyp kelip, táýelsizdikke jalǵasty. Qazirgi sıpaty tipti erekshe, eńbektegen baladan, eńkeıgen kárige deıin umytpaı atap, ózge ult ókilderi de qazaqtyń ulttyq kıimderin kıip, jadyraı kórisetin jal­pyhalyqtyq deńgeıge kóterildi. Mańǵystaýda sońǵy jyldary bul meıram «Otpan taý» tarıhı-mádenı kesheninde atalyp ótiletin boldy. Bıyl da jyldaǵy dástúrge saı Qarataý etegine 30-ǵa tarta kıiz úıler tigilip, Mań­ǵystaýdyń túkpir-túkpirinen kelgen qonaqtardy qabyldap, toı kórigin qyzdyrdy. Saltanatty sharaǵa oblys ákimi A.Aıdarbaev bastaǵan bas­shylyq ókilderi bardy. Aldymen Adaı ata kesenesine táý etip, Tobysh ata urpaqtary salǵan «Aqnıet» qaqpasynyń ashylýyna qatysty. Otpan taýdyń basynda turyp, amaldyń aq tańyn «Elimiz aman, zamanymyz tynysh, táýelsizdigimiz baıandy bolsyn!» dep tilek etken mańǵystaýlyq turǵyndardy A.Aıdarbaev, Par­lament Sena­tynyń depýtaty B.Shelpekov jáne sharany uıymdastyrýshy Tobysh ata balalary atynan D.Seıbaǵytov quttyqtady. Batagóı aqsaqal Lepes qajy Isaev bata berdi. Kókpar tartý, asyq atý, ózge de birneshe túrli sporttyq oıyndar oınalyp, jyr aqta­rylǵan, arnaıy kelgen aýdandar ónerpazdary konsertpen kómkergen mereke aıasynda týǵan jer tósine jas shybyqtar otyr­ǵyzyldy. Keler jylǵy sharany laıyqty uıymdastyrý úshin jaýapkershilikti Muńal ata urpaqtary qabyldap aldy. Mańǵystaýda amal merekesi aq tilek tilep, tal ekken, án-jyr áýeletip, jamyraı tabysqan, salt-dástúrdi tiriltken aq kó­ńil­derdiń merekesi bolyp jal­ǵasýda... Gúlaıym ShYNTEMIRQYZY, «Egemen Qazaqstan». Mańǵystaý oblysy.