Paralımpıada: júlde aýyly kóriner emes

Osy kúnderi Sochıde qysqy Paralımpıada oıyndary ótýde. Oǵan  Qazaqstannan bes sportshy qatysýda. Sochıde ótip jatqan Par­alımpıadaǵa álemniń 45 elinen 1650 múgedek sportshy qatysýda. Sportshylar slej-hokkeı, kerlıng, shańǵy jarysy, bıatlon, taý shańǵysynan 72 medal jıyntyǵyn sarapqa salýda. Al bizdiń elge kelsek, bıylǵy oıyndarǵa Qazaqstannan alǵash ret bes sportshy qatysýda. Qazaqstan Paralımpıada komıtetiniń derekterine qaraǵanda, bizdiń sportshylar Sochı synyna joldamany Kanada, Fınlıandııa, Germanııada ótken irikteý jarystarynda jeńip alǵan. Endi Paralımpıadaǵa qatysyp jat­qan sportshylarymyzǵa kelsek, oǵan bizdiń elden eki áıel, úsh er adam qatysýda. Eń jasy 23-te bolsa, jasy úlkeni 51-de. Paralımpıadaǵa joldama alǵandardyń eń jasy  — Jańyl Baltabaeva.  Ol shańǵyshylar arasyndaǵy  LW12 baǵdarlamasy boıynsha jarysqa qatysýda. Jańyl bala kezinen múgedek. Sportpen 13 jasynan beri aınalysýda.  2013 jylǵy Qazaqstan chempıony. Kelesi sportshymyz Qaırat Qanapınniń kózi nashar kóredi. Onyń jasy 38-de.  Jumys barysynda kózinen jaraqat alǵan eken.  Ol bıatlon men shańǵy jarysyna qatysýda. Sodan keıin 41 jastaǵy Aleksandr Kolıadın degen sportshymyz da shańǵynyń LW4 (tizeden tómen nemese joǵary protezi bar sportshylar arasyndaǵy jarys) baǵdarlamasy boıynsha baq synasýda. Áıelder arasynda 46 jastaǵy Elena Mazýrenko shańǵyshylardyń  LW6 (qoly protezdelgen sportshylar arasyndaǵy jarys) baǵdarlamasy boıynsha jarys jolyna shyǵyp jatyr. Ol sport sheberi ári Qazaqstan chempıony. Jalpy, elimiz sportshylary  osy kezge deıin bes qysqy Paralımpıadaǵa qatysqanymen, birde-bir medal almaǵan eken. Osyǵan baılanys­ty bizdiń mem­leketimiz Sochı Paralım­pıa­dasynda altyn medal alǵan sportshyǵa 50 000, kúmis alǵan otandasymyzǵa 35 000, qola alǵan sportshyǵa 25 000 AQSh dollary kóleminde syıaqy taǵaıyndady. Ázirge bizdiń sport­shyla­rymyzdyń Paralımpıadada joly bolar emes. Otandasta­rymyzdyń bári ózderi qatysyp jatqan jarystarda 10-nan ke­ıingi oryndardy alyp jatyr. Máselen, Jańyl Baltabaeva 1 shaqyrymdyq qashyqtyqqa oty­ryp jarysýda eń sońǵy, 23-oryndy aldy. Erler arasynda osy qa­shyq­tyqqa erkin ádispen túregep jarysýda Aleksandr Kolıadın 33-oryndy, Erlan Omarov 35-oryndy ıelendi. Áıelder arasynda osyndaı báıgede Elena Mazýrenko 16-oryn­dy qanaǵat tutty. Kózinen zaqymdanǵandar arasyndaǵy sprınt báıgeleriniń irikteý jarysynda Qaırat Qanafın 13-orynda tur. Bul jarys áli bitken joq. Erteń Paralımpıadanyń sońǵy kúni osy jarys túrinen syndar ótedi. Dastan KENJALIN, «Egemen Qazaqstan».