Sońǵy málimetterge súıensek, 19 qańtarda 2 025 adamnyń indet juqtyrǵany anyqtaldy. Sońǵy táýlikte 131 almatylyq emdelip shyqsa, ornyna 241 adam aýrýhanaǵa tústi. Infeksııalyq stasıonarlarda 2 380 tósektik oryn bar, onda jatqan 1 244 naýqastyń ishinde 179 bala emdelip jatyr. Jalpy, jansaqtaý jáne qarqyndy terapııa bólimshelerinde 71 pasıent bar. Buǵan qosa BMSK men Telemedısına ortalyǵy dárigerleriniń baqylaýynda 8 455 naýqas bolsa, olardyń ishinde jeńil jáne ortasha aýyr dárejesinde 8 008, sımptomsyz 447 naýqas tirkelgen.
О́tken aptada Almatynyń jańa bas sanıtary Qarlyǵash Ábdijabbarova «Omıkron» shtamy halyq arasynda kóp taralatyny jáne jaqyn arada «Deltany» yǵystyratyny týraly óz boljamyn jasap, koronavırýstyń kezekti tolqyny naýryz aıynda sharyqtaıtynyn aıtqan edi.
Qalalyq sanıtarııalyq-epıdemıologııalyq baqylaý departamenti koronavırýsqa qatysty derekterdi taldaı kele, synamalardyń 71%-ynda «Delta» nusqasy, taǵy 16%-ynda «Delta plıýs» jáne 4,7%-ynda basqa shtamdar tabylǵanyn, sondaı-aq 6 qańtardaǵy tolyq genomdyq sekvenırleý nátıjeleri boıynsha qalada alynǵan 7 synamada «Omıkron» anyqtalǵanyn málimdedi.
Almatynyń bas sanıtary koronavırýstyń jańa shtamdary megapolıs turǵyndary vaksınalanyp, býsterlik ekpelerdi alǵanǵa deıin paıda boldy, dep esepteıdi. Qalada áli de KVI-ǵa qarsy ımmýndyq qabat jetkiliksiz.
«Álemniń jetekshi ǵalymdary men sarapshylarynyń derekterine kóz salsaq, qoldanystaǵy vaksınalarmen revaksınalaý «Omıkron» shtamy saldarynan 70%-ǵa qorǵaıdy. Sondyqtan vaksına alǵanyna 6 aı ótken kópshilikti qaıta vaksınalaýǵa shaqyramyn. Bul kezeńde qala turǵyndaryna shekteý sharalarynyń talaptaryn qatań saqtaý, qoǵamdyq oryndarda áleýmettik qashyqtyq pen maska taǵý rejimin saqtaý óte mańyzdy», dedi Q.Ábdijabbarova.
Sondaı-aq ol 20-30 jas aralyǵyndaǵylar úshin «Omıkronnyń» qaýipti ekenin eskertti. О́ıtkeni vırýstyń jańa túri osy jastaǵylarǵa erekshe áser etetin kórinedi. Qarap otyrsaq, tek ótken aptada koronavırýs juqtyrǵandardyń úlesi 20 jastan 40 jasqa deıingi adamdar arasynda 16,4%-ǵa, jasóspirimder arasynda 1,1%-ǵa kúrt ósti. Bul «Omıkron» shtamyna da tán.
Almatyda indetke qarsy egý bastalǵaly beri birinshi komponentpen 1 092 822 adam, ekinshi komponentpen 1 040 794 adam vaksınalandy. Vaksına alǵandardyń ishinde 60 jastan asqan adamdar sany – 123 697.
Búgingi tańda Pfizer kompanııasynyń ekpesin 35 158 adam, onyń ishinde 1 913 júkti áıel, 7 392 sábıi bar ana men 25 853 bala saldyrdy. 98 762 qala turǵyny revaksınalaýdan ótti.
Qazir qalanyń medısınalyq uıymdarynda 119 vaksınalaý pýnkti jumys isteıdi. Budan bólek 140 vaksınalaý brıgadasynda 522 medısına qyzmetkeri jumyldyrylǵan.
ALMATY
