Juqpaly dertpen jaǵalasýǵa úırengen, azdy-kópti tájirıbesi qalyptasqan densaýlyq saqtaý salasy dertke shaldyqqandarǵa kómek kórsetýge ázir. Búgingi tańda oblysta koronavırýstyń qarmaǵyna ilikkenderdi emdeý úshin 870 tósektik oryn daıyndalǵan. Buǵan qosa 105 reanımasııalyq oryn da bar. Qazirgi kúni juqpaly aýrýlar aýrýhanalarynda 432 naýqas em qabyldaýda. Bul – barlyq orynnyń 50 paıyzy. 30 adam – jansaqtaý bóliminde. Bul jerdegi tósektik orynnyń qamtylý kórsetkishi – 28 paıyz. Eger «jaman aıtpaı, jaqsy joq» degendeı, indet órship ketse, em qabyldaý qoljetimdi bolýy úshin barlyǵy 3 myńnan asa tósektik oryn daıyndalǵan. Demek bul oraıdaǵy qamdaný qapysyz dep aıtýǵa bolady.
Juqpaly aýrýmen kúres sharasyna barlyǵy 930 medısına qyzmetkeri tartylyp otyr. Onyń 176-sy – dáriger. Indet alǵash paıda bolǵan kezde medısına qyzmetkerleriniń tapshylyǵy baıqalǵan edi. О́z basyn qaterge tikken sala qyzmetkerleriniń ózderi de kóp aýyrdy. Osy jaıdy eskergendikten, qajet bola qalsa, halyqqa qyzmet kórsetýge 332 medısına qyzmetkeri daıyndalǵan. Onyń 102-si – dáriger. Qoldanystaǵy tósek-orynmen qamtamasyz etý 100 paıyzdy quraıdy. Shuǵyl shaqyrtýlarǵa oblystyq jedel járdem stansasynyń 59 feldsherlik brıgadasy qyzmet kórsetedi.
Koronavırýs ınfeksııasymen kúres aıasynda oblystyq medısına uıymdarynda 802 mln teńge qarajat kólemindegi dári-dármek pen medısınalyq maqsattaǵy buıymdardyń eki aılyq qory jasaqtalǵan. Kúndizgi stansıonarda jalpy quny 105 mln teńge bolatyn dári-dármek qory bar. Naýqastarǵa tegin bosatylatyn dáriniń qoldaǵy qorynyń jalpy quny – 79 mln teńge.
О́ńirde 133 egý pýnkti men 135 mobıldi brıgada jumys isteıdi. Vaksına egýge 564 medısına qyzmetkeri tartylǵan. Sonymen qatar Aqkól, Arshaly, Astrahan tárizdi 11 aýdanda ekpe egetin jyljymaly medısınalyq keshen bar.
– Derttiń aldyn alý tek qana ekpege baılanysty. Bul – menshik túrine qaramastan uıym jumysyn toqtatpaýdyń birden bir joly. Máselen, 100 paıyz vaksına alǵan ujymnyń bir qyzmetkeri aýyra qalsa, ujym jumysy shtattyq rejimde jalǵasa beredi, – deıdi oblystyq densaýlyq saqtaý basqarmasynyń basshysy Narıman Syzdyqov.
Bas dárigerdiń aıtýyna qaraǵanda, vaksına almaǵan jaǵdaıda bir qyzmetkeri aýyra qalsa, ujymnyń barlyǵy PTR-test tapsyryp, karantınge jiberiledi.
О́tkennen sabaq alǵan durys. Derttiń deńgeıi nege óskendigin eldiń bári kórip, bilip otyr. Sondyqtan aldaǵy ýaqytta beısaýat júristi tyıyp, ýaqtyly ekpe alyp, saqtandyrý sharalaryn buljytpaı oryndaǵan jón.
Aqmola oblysy
