Bloomberg-tiń jazýynsha, ıemendik hýsıtterdiń OPEK óndirýshileriniń iri úshtigine kiretin Birikken Arab Ámirlikterine shabýyl jasaýy munaı baǵasynyń kóterilýine áser etti. «Naryqtaǵy kóńil kúıdi pozıtıvti dep baǵalaýǵa bolady, al BAÁ-ge jasalǵan shabýyl baǵany taǵy da kóterip jiberdi» deıdi ING sarapshysy Ýorren Patterson. Sebebi mundaı tosyn oqıǵalar kezinde treıderler munaı jetkizý kezinde irkilis bola ma dep qorqady. Eger tótenshe jaǵdaıdyń óndiriske kesirin tıgizbeıtini anyqtalsa, onda baǵa tómendeı bastaıdy. Al eger ahýaldyń uzaq merzimdi zardaby bolsa, onda baǵa sharyqtaı túsedi.
2022 jyldyń 17 qańtarynda hýsıtter Abý-Dabıdegi Ulttyq munaı kompanııasynyń nysandary men halyqaralyq áýejaı mańyndaǵy qurylys alańyna ushqyshsyz ushaq jáne ballıstıkalyq zymyrandarmen shabýyl jasap, saldarynan 3 adam qaza taýyp, altaýy jaraqat aldy. «Ál-Jazıra» telearnasynyń habarlaýynsha, hýsıtter qarýly kúshteriniń qolbasshysy Mahdı ál-Mashat «eger Ámirlikter agressııa tanytar bolsa, onda olardyń ekonomıkasy men ınvestısııasyna budan da zor qater tóndiremiz» dep málimdepti.
Iemendegi ahýal 2014 jyldan beri shıelenisip tur. Sol jyly úkimettik kúshter men hýsıtter arasynda qarýly qaqtyǵys bastaldy. 2015 jyldan bastap Saýd Arabııasy bastaǵan arab koalısııasy úkimetke kómektesip keledi. Sońǵy ýaqytta BAÁ áskerı operasııalarǵa qatysýyn aıaqtaǵanyn málimdegenimen, Iemen porttarynda qurǵan áskerı bazalaryn alyp ketken joq. Sońǵy birneshe aptada BAÁ úkimet tarapynda birneshe provınsııada hýsıtterge qarsy soǵysty. Sonyń nátıjesinde Shebva provınsııasynyń ońtústik-shyǵys aýdanyn úkimet baqylaýyna qaıtardy. Hýsıtterdiń Ámirlikterge yzalaný sebebi osynda jatyr. Olar buǵan deıin 2019 jyly Saýd Arabııasynyń munaı óńdeý zaýyttaryna shabýyldap, sonyń saldarynan óndiris kólemi 2 ese quldyraǵan edi.
CMC Markets sarapshysy Esh Glover bıyl munaıǵa degen suranys usynystan asyp túsedi deıdi.
«О́ıtkeni álem eki jyldyq oqshaýlanýdan shyǵyp, endi ǵana qalypty suranys traektorııasyna oralyp jatyr. Jeltoqsanda OPEK+ elderi munaı óndirisi ósimin qańtarda táýligine 400 myń barrelge jetkizýge kelisti. Alaıda keıbir iri óndirýshiler ınvestısııanyń jetpeýinen óndiris qýattylyǵynyń tapshylyǵyn sezinip otyr jáne ruqsat etilgen kvota kóleminde munaı óndirisin ulǵaıta almaıdy. Eger qazirgi geosaıası qysym saqtalsa jáne OPEK+ músheleri táýligine 400 myń barrel munaı óndire almasa, onda baǵa barreline 100 dollarǵa deıin kóterilip ketýi múmkin» dep boljaıdy Glover.
Goldman Sachs Group Inc sarapshylary da munaı baǵasy 100 dollarǵa jetedi degenge senedi. Naryq bul mejege 2022 jyldyń úshinshi toqsanynda jetýi bek múmkin. Álbette, munaı baǵasynyń qymbattaýy biz úshin pozıtıvti jańalyq bolyp sanalady. FINANCEkaz telegram kanalynyń jazýynsha, «qara altyn» qunynyń 88 dollardan asýy teńgeni sergek ustaýǵa sebep bolady.
«Alparı» kompanııasynyń aǵa taldaýshysy Anna Bodrovanyń aıtýynsha, teńge – shıkizattyq valıýta, sondyqtan onyń munaı naryǵyndaǵy ózgeriske eleń etpeýi múmkin emes.
«Baǵa nelikten bulaı kúrt ósti? Birinshiden, ınvestorlar energııa tasymaldaýshylarǵa turaqty suranystyń bolaryna senimdi. Reuters atap ótkendeı, aıdyń basynda hedj-qorlar men basqarýshy kompanııalar munaı boıynsha uzaq pozısııalar kólemin belsendi túrde keńeıtti, óıtkeni energııa tasymaldaý kezinde fızıkalyq tapshylyqty kórdi. Ekinshiden, qara altyndaǵy tehnıkalyq sıgnaldar bir mándi jáne satyp alýdyń ári qaraı jalǵasatynyn kórsetedi. Sońǵy táýlikte amerıkalyq dollar álemdik valıýta naryǵyndaǵy pozısııasyn qalpyna keltirip, salystyrmaly tepe-teńdikti ustady. Bul teńge úshin neıtraldy jańalyq. Jaqyn arada dollar 433-435 teńge dálizinde qozǵalýy múmkin» deıdi sarapshy.
