Jalpy, oblystyń 2021-2025 jyldarǵa arnalǵan áleýmettik-ekonomıkalyq damýy keshendi josparynyń aıasynda byltyr 346 myń sharshy metr turǵyn úı paıdalanýǵa berildi. Sonyń 217 sharshy metri – tek Petropavl qalasynda. Bul qala sońǵy bes jylda ájeptáýir ózgerdi. Buryn qalanyń kireberisi – Kırov kóshesiniń boıynda bir qabatty úıler sektory bolatyn. Shaharǵa joǵary laýazymdy qonaq kele qalsa, qala basshylary sol úılerdiń syrtyn syrlatyp, birkelki sharbaq saldyryp, shala shabylyp qalatyn. Biraq jartysy jerge kirip ketken úılerdi qansha árleseń de jasyra almaısyń.
Qazir qaladaǵy eń úlken osy kóshe – tutasymen jyr alyby Jambyldyń atynda. Mundaǵy barlyq jutań úı syrylyp, onyń ornyna zamanaýı arhıtektýraǵa saı úıler boı túzegen. «Jas órken» shaǵyn aýdanynda 900 oryndyq qazaq mektebi ashylǵan, qazaq teatrynyń qurylysy qolǵa alynǵan. О́kinishke qaraı, teatrdyń qurylysy eki jyldaı turalap, bıyl qaıta bastaldy.
Byltyr oblystyń barlyq aýmaǵynda qurylys júrgizý úshin 106 mlrd teńge ıgerildi. Bul – 2020 jylmen salystyrǵanda 4,7 paıyzǵa kóbirek. Qurylystyń negizgi baǵyty – áleýmettik nysandar. Sonyń ishinde Petropavl qalasyndaǵy Ýálıhanov kóshesinde 900 oryndyq mektep, Shal aqyn aýdanynda 160 oryndyq dene tárbıesi jáne saýyqtyrý kesheni salyndy. Osydan sál kishirek keshen Jambyl aýdanyndaǵy Qaırankól aýylynda da turǵyzyldy. Al Maǵjan Jumabaev aýdanynyń ortalyǵynda hokkeı korty boı kóterdi.
«Memlekettik «Nurly jer» baǵdarlamasynyń sheńberinde «Otbasy bankinen» 1,4 mlrd teńgeniń 285 zaımy berildi. Zaımnyń jyldyq ósimi – 5 paıyz ǵana. Osy baǵdarlamanyń «Shańyraq» qanatqaqty jobasy boıynsha kezekte turǵan 208 ákimdik qyzmetkeri úı jaıyn jaqsartty. «Baqytty otbasy» baǵyty boıynsha 437 mln teńgeniń 47 zaımy berilgen. «Otbasy bankiniń» qarajatyna barlyǵy 8 ǵımarattan turatyn 861 páterlik turǵyn úı salyndy», deıdi bank fılıalynyń dırektory Almas Japabaev.
Áleýmettik qurylys jumystarymen qatar osy salada aldaǵy jyly iske asyrylatyn jobalardyń smetalyq qujattary daıyndaldy. Sonyń ishinde Petropavl qalasynda sporttyń 32 túrimen 3 124 adamǵa aınalysýǵa múmkindik beretin jańa sport saraıynyń jobasy aıaqtaldy. Al Ýálıhanov aýdanynyń ortalyǵy Kishkenekól aýylynda 2,5 mlrd teńgeniń 250 oryndyq emhanasynyń jobasy daıyndaldy.
Qurylys basqarmasynyń bastyǵy Q.Galeevtiń aıtýynsha, Soltústik Qazaqstan oblysynyń qurylys salasy osy jyly 120 mlrd teńgeniń jumysyn ıgerýdi josparlap otyr. Sonyń ishinde paıdalanýǵa berilgen turǵyn úılerdiń aýqymy 401 myń sharshy metrge jetti.
Halyq arasynda «Kapaı» atanyp ketken shaǵyn aýdannyń eski úıleri de byltyr súrilip, jeri bosatylǵan. Qyzyljarda kóshe salýdy oılamaı, oıylǵan shymnan qalanǵan jappalaryn bir-birine jalǵastyryp jypyrlatyp sala bastaǵan XIH ǵasyrdan beri bul shaǵyn aýdannyń qalpy ózgermegen. Keńes Odaǵy jyldarynda da bul aýdandy túzetýge eshkimniń tisi batpady. Jaqsy úıler salynsa da, kóshelerin qalypqa keltirý ońaı bolmady. «Kapaıda» kóshe joq, tek úıler nómirlengen bolatyn, biraq nómirdiń ózi qyzyq. Mysaly, 100-shi nómirli úıden keıin kelesi turǵany 1000-shy bolyp kete beretin. Endi sol jerge 647 páterli 9 turǵyn úı salynbaq.
Al qala boıynsha barlyǵy 983 páterli 13 kóp qabatty úı turǵyzý josparlanǵan. Sonymen qatar bıýdjettik qarajattan tys, jekemenshik kapıtaldyń kúshimen 1 732 páterli 24 kommersııalyq úıler salynbaq. Alaıda halqy qujynap jatatyn mıllıoner qalalar sııaqty 18 qabatty 10 úıdiń salynatyny kóp adamdy qýanta qoımady. «Zertteý SK» atty jekemenshik qurylys kompanııasy tipti 30 jáne 35 qabatty 267 páterden turatyn eki turǵyn úı qurylysyn bıyl bastamaq. Halqynyń sany 250 myńǵa jetpeıtin shaǵyn qalaǵa turǵyndardy, avtokólikterdi tar jerge qumyrsqanyń ıleýindeı qujynatatyn tym bıik úılerdiń qandaı qajettiligi bar? Halyq erkin tynystaý úshin qalanyń bıikke emes jazyqqa óskendigi paıdaly ǵoı.
Byltyr jeltoqsan aıynda Petropavl qalasynyń Bas josparynyń tolyqtyrylǵan nusqasy saraptan ótip, Indýstrııa jáne ınfraqurylymdyq damý mınıstrliginiń qurylys jáne turǵyn úı-kommýnaldyq sharýashylyǵy komıtetinde bekitildi. Endi bul bıylǵy qańtar aıynda Ádilet, Ulttyq ekonomıka, Qarjy, Indýstrııa jáne ınfraqurylymdyq damý mınıstrliginiń kelisimin alady. Osy mınıstrlikterdiń biri bolsyn osy saýaldy alǵa tartar degen úmittemiz.
Soltústik Qazaqstan oblysy
