Qazir RV-90 I.Jekenova atyndaǵy Juqpaly aýrýlar aýrýhanasynyń fılıalynda indetke shaldyqqan 199 pasıent bar, onyń 21-i jansaqtaý bólimshesinde. Ortalyq qalalyq klınıkalyq aýrýhanasy bazasynda ashylǵan telemedısına ortalyǵy mamandarynyń baqylaýynda 10 188 pasıent bar. Bul kórsetkish bıylǵy 1-20 qańtar aralyǵynda 20 ese ósti. Ortasha alǵanda, pasıentterge shamamen 5 myń qońyraý shalynady. 20 qańtarda 8 458 qońyraý soǵyldy, onyń barysynda naýqastyń jaǵdaıy suralyp, KVI emdeý boıynsha usynymdar beriledi. Al №7 aýrýhana bazasynda ornalasqan KVI-ǵa qarsy vaksınalardyń qalalyq qoımasynda jáne egý pýnktterindegi I jáne II komponentti vaksınalardyń qaldyǵy Sınofarm vaksınasynyń 207 733, QazVac vaksınasynyń 176 349, Pfizer 254 782 dozasyn quraıdy.
Qala ákimi B.Saǵyntaevtyń qatysýymen ótken KVI taralýyna qarsy is-qımyl jónindegi shtab otyrysynda kovıdtik stasıonarlardyń bas dárigerleri pasıentterdi qabyldaý jáne emdeý barysy týraly baıandady. Balalar men júkti áıelderdi emdeýge erekshe kóńil bólinip otyr. Máselen, 1-20 qańtar aralyǵynda qalalyq balalar juqpaly aýrýlar aýrýhanasyna KVI juqtyrǵan 346 bala tússe, ınfeksııalyq bólimshelerde 102 júkti áıel bar.
О́tken aptada Almaty qalalyq qoǵamdyq densaýlyq basqarmasynyń qoımasyna Spýtnık Laıt vaksınasynyń 12 000 dozasy jetkizildi. Bul vaksına revaksınalaýǵa arnalǵan.
ALMATY
