Toǵyz kún toılanady

О́tken jyly Ońtústik Naýryz meıramyn toǵyz kún boıy erekshe jaǵdaıda atap ótken bolatyn. Ár kúnge ataý berilip, uıym­dastyrylǵan tárbıelik is-sharalar jalpyhalyqtyq merekeniń mán-mazmunyn ashýǵa súbeli úles qosty. Oblystyń bul ıgi bastamasyn respýblıkalyq buqaralyq aqpa­rat quraldary durys túsinip, ıgi tirlikti jan-jaqtan qoldap jatty. Tipti,  Par­­­­lament Senatynyń depýtattary Ońtústik Qazaqstan oblysynyń bul bastamasyn búkil el aýmaǵynda úlgi etý kerektigin aıtyp, Úkimetke depýtattyq saýal joldady. Bıyl da sol úrdis jalǵasyn taýyp, Naýryz meıramy keń kólemde toılanbaq. Naýryz – jańa dáýren men jaqsylyqty aıshyqtaıtyn ári ótkendi saralap, búgindi baǵamdaıtyn, Tabıǵat-ananyń oıanyp, tirshilik ataýlynyń túleıtin kezeńi. Iаǵnı, halqymyzdyń kóneden kele jatqan Naýryznama dástúrin zamanaýı úlgide qaıta jańǵyrtýǵa baǵyttalyp, merekelik sharalar toǵyz kún boıy jalǵasyn tappaq. Árıne, ár kún ózindik erekshelikterimen este qalmaq. Sóıtip, Ońtústikte bul mereke «Taǵzym kúninen» bastaý aldy. Qazaq halqynyń eski jyl sanaýy boıynsha kóktem osy kezde keledi dep eseptelgen. Elimizdiń batys óńirlerinde bul kúni kórisý amaly jasalady. «О́li razy bolmaı tiri baıymaıdy» degen halqymyz úshin ata-babalar rýhyna taǵzym etý mańyzdy. Onyń ústine bıylǵy bul kún aptanyń juma kúnine sáıkes keldi. Sondyqtan, barlyq meshitterde quran baǵyshtalyp, jastar Otan qorǵaýshylarǵa arnalǵan eskertkishterge gúl shoqtaryn qoıdy. Munan keıin uly meıram «Alas kúni», «Bereke», «Kóktem shýaǵy», «О́nis kúni», «Jaınaý kúni», «Shattyq kúni», «Úılesim kúni» jáne «Ulys kúnine» ula­­sa­dy. Bul kúnderi senbilikter uıym­dastyrylyp, aryq-atyzdar tazalanady, turmysy tómen otbasylar men muqtaj jandarǵa kómek kórsetiledi, oblys basshylary, qala jáne aýdan ákimderi ardagerlermen kezdesip, qarııalarǵa kómek kórsetip, qaıyrymdylyq sharalaryn ótkizedi. Sondaı-aq, Naýryz meıramy qarsańynda ómirge kelgen sábıler men olar­dyń ata-analaryn quttyqtap, shaǵyn syı-sııapattar jasalady. Jastardyń qatysýymen merekelik avtosherý, sporttyq jarys­tar uıymdastyrylyp, ortalyq alańǵa jastar jınalyp, tańdy kútip, bir-birine jasaǵan syılyqtaryn tapsyrady. Merekelerdiń tóresi sanalatyn Ulys­tyń uly kúnin, mine, ońtústikqazaqstandyqtar osylaı erekshe túrde atap ótpek. Laıym, bul dástúr jastarymyzdyń sanasyn jańǵyrtyp, ultyna, eline degen súıispenshiligin arttyra bersin. Oralhan DÁÝIT, «Egemen Qazaqstan». Ońtústik Qazaqstan oblysy.