QAHARMAN RÝHY QANATTANDYRADY

ATYRAÝDA QAZAQTYŃ QAISAR QYZY HIÝAZ DOSPANOVAǴA ESKERTKISh AShYLDY Ekinshi dúnıejúzilik soǵysta áýege jaýyngerlik tapsyrmamen 300 ret kóterilip, fashıstik basqynshylardyń tóbesinen qyrandaı shúıilgen qazaq qyzy Hıýaz Dospanovanyń eren erligi qaı kezde de ulyqtaýǵa laıyq. Elimiz táýelsizdik alǵannan keıin apamyz jaıly baspasózde turaqty jazyldy. Onyń elimizdiń eń joǵary marapaty – Halyq Qaharmany ataǵyna laıyqty ekendigi “Egemen Qazaqstan” gazetinde udaıy kóterildi. Bul oryndy usynys aıaqsyz qalmady. Elbasy Nursultan Nazarbaevtyń Jarlyǵymen erlik pen órliktiń, batyrlyq pen qaısarlyqtyń úlgisin kórsetken Hıýaz Dospanovaǵa Halyq Qaharmany ataǵy berildi. Osylaısha, eliniń atyn shyǵarar erge tán erligimen tanylǵan qaısar rýhty qazaq qyzynyń mártebesin týǵan eli kóterip, mereıin tasytty. Qaıtalanbas erlik pen shejireli eńbekke toly ómir jolyn jas urpaqqa úlgi-ónege etti. Hıýaz Dospanovanyń kindik qany tamǵan Atyraýda da onyń esimin máńgi este qaldyrý sharalary qolǵa alynýda. Máselen, byltyrǵy shildede óńir orta­ly­ǵynda jańadan boı kótergen muz aıdyny saraıyna ushqysh apamyzdyń aty berildi. Sol kezde oblys ákimi Ber­geı Rysqalıev: “Qazaqtyń qaharman qyzy Hıýaz Dospanovanyń esimin máńgi este qaldyrý sharalary kindik qany tam­ǵan jerde jalǵasa beredi. Aldaǵy ýaqytta onyń eskertkishin ashý oıda bar”, degen edi. Sodan beri bul másele álsin-álsin qozǵa­lyp, Jeńis merekesi qarsańynda túpki­likti tııanaqtaldy. Taıaýda Atyraý qalasynda Qazaqstan­nyń Halyq Qaharmany Hıýaz Dospanova­nyń mystan quıylǵan eskertkishiniń ashylý rásimi ótti. Oǵan oblys ákimi Bergeı Rysqalıev, qaharman ushqyshtyń uly Erbolat Ámirov, soǵys ardagerleri men qala jurtshylyǵy kóptep qatysty. Eskertkishtiń aq jamylǵysyn oblys ákimi Bergeı Rysqalıev pen soǵys ardageri Aıdyn Aıbarov birlese sypyrǵanda, áýede qyrandaı samǵaǵan áskerı ushaqtyń shtýrmany Hıýaz apanyń asyl beınesi jarq ete qaldy. О́zi de maıdanda ushqysh bolyp, talaı ret jaýyngerlik tapsyrmalar oryndaǵan maıdanger Aıdyn Aıbarov aqsaqal Otan­nyń tynyshtyǵy men beıbit ómir úshin ot pen oqtyń ortasynan oralmaǵan bozdaq­tar­ men kózi tiri maıdangerlerdiń erligi eshqashan óshpeıtindigin tilge tıek etti. “Mine, búgin sonyń bir kórinisine, qazaqtyń qaısar qyzy, Halyq Qaharmany Hıýaz Dospanovanyń eskertkishiniń ashylýyna kýá boldyq. Bul – erlikke taǵzym!”, dedi maıdanger. Joldasbek ShО́PEǴUL. Atyraý oblysy.