Túp tuqııanymyz bolyp sanalatyn saqtardan qalǵan Altyn Adam jáne taǵy basqa jádigerlerdi aıtpaǵanda Qazaq eli urpaǵyna ulan-baıtaq jerdi mura etip qaldyrǵany qandaı ǵalamat?! Tizbeleı bersek, Adam Ata-Haýa Anadan taraǵan urpaqtyń birinen ekinshisiniń qundylyǵy asyp túsetin baı murasynyń urpaq kádesine jaraýynyń ózi babalarymyzdyń dara danalyǵyn, kóregendigin, danyshpandyǵyn, batyrlyǵyn hám urpaq aldyndaǵy adaldyǵyn bildiretini taǵy anyq. Baǵzy zamandarda erensiz ǵana «qazaq eli» dep atalǵan kóshpendiler búginde birtutas memleketke aınalyp, tórtkúl dúnıege tek jaqsy qyrynan máshhúr bolyp otyr. Osynaý daralyqty dóp basqan Elbasy, mine, búgin memleketimizdiń ataýyn ómirdiń ózinen alyp Qazaq eli dep ózgertý týraly usynysyn ortaǵa tastady. Bul sátti ári tarıhı ataý. Olaı deıtinim, tarıhta bir ret oryn alǵan oqıǵa eshqashan qaıtalanbaıdy. Eldiń, jerdiń, sýdyń, tipti juldyzdardyń da ataýy dýaly aýyzdan bir ret shyqqan soń, el ilip áketedi. О́ıtkeni, ol – tarıh. Sol tarıhnamany bir kisideı oqyp, rýhanı qajettiligimdi alǵandyqtan Qazaq eli – «Máńgilik el» degen sózder qulaǵyma maıdaı jaqty. Endi she, biz osy arqyly daramyz. Bul
bizdi ekonomıkalyq qarym-qatynas barysynda dini bir bolǵanymen tili, dili bólek irgemizdegi ózge eldermen shatastyrmas úshin de qajet. Mine, osyndaı irkes-tirkes kókeıime kelgen sózderdi oı eleginen ótkizdim. Aqyl tarazysyna sala otyryp, Tuńǵysh Prezıdentimiz Nursultan Nazarbaevtyń usynysyn qoldaý kerektigin birinshi kezekte el gazeti «Egemen Qazaqstan» arqyly jurtqa jetkizsem deımin.
Almatydaǵy zamandastarymmen bas qosa qalǵan kezderde ortaq taqyryp: elimizdiń búgingi jáne bolashaq ómiri týraly keleli áńgimemen ádemi sabaqtasyp jatady. Shyny kerek, ótkendi kókseý, bireýdiń syrtynan artyq sóz aıtý bizge jat.
Qudaıǵa shúkir, sheteldik zııaly qaýymnyń buqaralyq aqparat quraldary arqyly bizge jetetin oı-pikirlerin hám san taraptaǵy tujyrymdaryn saralap, zerdelesek yntymaqqa uıyǵan elder Qazaqstandy ıadrolyq qarýdan óz erkimen bas tartqan, beıbitshiliktiń bir tamyry ári beıqut ómir kepili sanatyna qosatynyn uǵynamyz. Bul baǵalaǵandyq desek, artyqtyq etpeıdi. Sóz reti kelgende aıta ketsem, Prezıdent Nursultan Nazarbaevtyń «Qazaqstan joly – 2050: bir maqsat, bir múdde, bir bolashaq» atty halqyna Joldaýy kóp jaıdy ańǵartady. Dúnıejúzilik beıbitshilikti qorǵaý komıtetiniń múshesi bolǵandyqtan basty ustanymym – beıbitshilik. El irgesi bútin bolyp qashanda sútteı uıyp otyrǵany Memleket basshysynyń eren eńbeginiń bir jemisi dep sanaımyn. Bul tujyrym kópten kókeıimde júr edi. Endi, mine, ábden pisip jetilgende alǵa tartylyp otyr. Elbasy bıylǵy dástúrli Joldaýynda:
«Qadirli halqym!
Máńgilik El – ata-babalarymyzdyń san myń jyldan bergi asyl armany.
Ol arman – álem elderimen terezesi teń qatynas quryp, álem kartasynan oıyp turyp oryn alatyn Táýelsiz Memleket ataný edi.
Ol arman – turmysy baqýatty, tútini túzý ushqan, urpaǵy erteńine senimmen qaraıtyn baqytty El bolý edi.
Biz armandardy aqıqatqa aınaldyrdyq. Máńgilik eldiń irgetasyn qaladyq. Men qoǵamda «Qazaq eliniń ulttyq ıdeıasy qandaı bolýy kerek?» degen saýal jıi talqyǵa túsetinin kórip júrmin. Biz úshin bolashaǵymyzǵa baǵdar etetin, ultty uıystyryp, uly maqsattarǵa jeteleıtin ıdeıa bar. Ol – Máńgilik El ıdeıasy» dedi. Dál osy jerde eskeretin jaıt osynaý qundylyqtyń dámin ketirip, jalań uranmen, ıaǵnı bir sáttik daýryqpamen bastyrmalatýdyń esh qajettigi joq. Bireý bilip, bireý bilmeı daýryǵatyny da jasyryn emes. Sondyqtan «Máńgilik El» ıdeıasyn jete túsiný úshin aǵa býynnyń basty mindetiniń biri, halyq senimin arttyrý kerek. Al jastar ózderine Elbasy artqan amanat – Táýelsizdikti saqtaýǵa jumyla kiriskeni durys. Árbir jas óskinniń júreginde: «Maǵan Elbasy senim artty ma, sol senimge selkeý túsirmeý paryzym!» degen maǵynadaǵy sóz uıalaǵany abzal.
Negizi búgingi uǵym boıynsha «Máńgilik El» ıdeıasy qalaı júzege asady? Qazaqta «Altyn shyqqan jerdi belden qaz» degen jaqsy sóz bar. Sondyqtan Táýelsiz memleketimizdiń irgesin tatýlyqpen, dostyqpen, yntymaqpen myqtap bekitken Elbasyn qoldaýmen birge, nyq senim artqan jón. Sonda kóńil hoshy jaılanǵan ústine jaılana túsetin Elbasy halqyn qutty jolǵa bastaǵan ústine bastaı biletini aqıqat. Nátıjesin ýaqyt atty tóreshi kórseteri haq. Asyǵý, aptyǵý qajet emes. Qazaqstandy álemniń órkenıetti 30 eliniń qataryna qosý joldaryn qarastyrǵan Aqordadaǵy keleli jıynnan el tizginin ustaǵan azamattar tyń oılar túıip qaıtqan bolar. Sol oımen, naqtylaı tússem, Elbasynyń sarabdal saıasatyna saı salynǵan sara joldan taımaı, óńir ekonomıkasyn kóterýge jurtty jumyldyra kirisse, óńir basshylary tól mindetterin qaltqysyz oryndaǵany bolar edi.
Jyldyń bas qujaty bolyp sanalatyn Joldaýdan, sosyn «Egemen Qazaqstan» gazetinen oqyp kókeıime taǵy bir túıgenim, búgingi kún talaby – ıntegrasııalyq úrdisterdi qarapaıym halyqqa uǵyndyrý bolyp otyr. Integrasııa degenimiz, taza ekonomıkalyq sıpatta óristep jatqan qadam. Iá, elimiz órkenıetke umtylǵan saıyn ýaqyt aǵymyna saı áreket etý, qandaı da qysyl-taıańnan ebin taýyp, qınalmaı ótý qajettiligi ústi-ústine týyndaıtyny anyq. Taǵy bir qyry, keńestik dáýirde eki ult ókili otaý qursa keremet dáriptelip jatatyn. Osyny búgingi ıntegrasııalyq úrdispen shatastyrmaǵan abzal. Ras, qazir eki el kásiporyndary qosylyp ortaq maqsatta tabys tabý jolyn qarastyrsa ıntegrasııalyq qadam bolyp sanalady eken. Jón.
Qoryta aıtqanda, ótkendi estip, oqyp, bilý bar da búgingini eksheý bar. Búgindi kórý, zerdeleý, suryptaý bar da tujyrymdaý bar. Jasym seksenniń seńgirine shyqqandyqtan ári oqyǵanym men toqyǵanym bar bolǵandyqtan Elbasynyń Qazaq eli dep memleketimizdi ataý jónindegi usynysyna ún qatpaı jatyp alýdy azamattyǵyma ar sanadym!
Izbasar BALTAǴULULY,
Dúnıejúzilik beıbitshilikti qorǵaý komıtetiniń múshesi.
Almaty oblysy.
