Bas sanıtarlyq dárigerdiń sózine qaraǵanda, 22 qańtarda, ıaǵnı bir táýlikte 2,5 myń almatylyq koronavırýsqa shaldyqqan. Aı sońynda táýligine 3 myńǵa deıin naýqas tirkelýi kútilýde.
«Byltyr aqpan aıynda vaksınalaý bastalǵaly ekpe alýshylardyń tek 2,1%-y indet juqtyrǵan. Bul málimet qala turǵyndaryna vaksınalaý men revaksınalaý qarqynyn kúsheıtýdi talap etedi. Qalada ımmýndyq júıe 62,4% quraıdy», deıdi Q.Ábdijabbarova.
Qazir Almatyda negizinen 20-39 jas aralyǵyndaǵylar indetke kóbirek shaldyǵyp otyr, aýyrǵandardyń 40%-y osy jastaǵylar, al 40-59 jastaǵylar – 26,7%, 60 jastan asqan adamdar – 19,3%. Indetke shaldyqqandar ishinde zeınetkerler – 1,5% bolsa, mektep jasyna deıingi balalar arasynda – 0,8%, bank salasynyń qyzmetkerleri arasynda – 0,2%, uıymdar, seriktestikter, jeke kásipkerler arasynda 0,1%-ǵa óskeni baıqalady.
Almatyda karantındik shekteýler ishinara alynǵanymen, konsert zaldary, teatrlar, sırkter, fılarmonııalar qyzmetine, konferensııalar, semınarlar, kórmeler, forýmdar, túngi klýbtar, karaoke qyzmetine shekteý qoıylyp, ujymdyq dinı joralar ótkizýge tyıym salyndy. Qoǵamdyq tamaqtaný oryndaryna kelýshiler sanyn 4 adamǵa deıin jáne kınoteatrlardyń tolymdylyǵyn 30%-ǵa deıin qysqartý týraly talap saqtalady.
Bul nysandardyń bári Ashyq aıasynda «qyzyl aımaqtyń» qoldanystaǵy ólshemderimen jumys istemek. Mysaly, konsertter, teatrlar, kınoteatrlar, qoǵamdyq tamaqtaný, túngi klýbtar, karaoke – 50 paıyzǵa deıin, 50 adamnan artyq emes, kórmeler – 70%-ǵa deıin 200 adamnan artyq emes.
Al 24 qańtardan bastap balabaqshalar ata-analardyń ótinishi boıynsha shtattyq formatta, jalpy bilim beretin mektepter – 600 balaǵa deıingi kontıngenti bar 1-den 4-synypqa deıin shtattyq formatta, al 600-den astam oqýshysy bar mektepter – 50%-ǵa shtattyq formatta jumys isteýge ruqsat etilgen.
Sondaı-aq mektepten tys jáne bilim berý ortalyqtarynyń shtattyq formattaǵy, JOO men kolledjderdiń aralas formattaǵy jumysyna ruqsat etildi. Vaksınalanǵan oqýshylarǵa mektep ákimshiliginiń qalaýy boıynsha offlaın rejimde ruqsat etiledi.
ALMATY
