Prezıdent óz sózin Úndistan halqyn keshe ótken respýblıka kúnimen quttyqtaýdan bastady.
«Úndistan egemendi damý kezeńinde tarıhı órkenıettiń elshisi retinde damýdyń joǵary deńgeıine shyqty. Bul sammıttiń Ortalyq Azııa elderi men Úndistannyń dıplomatııalyq qarym-qatynasynyń 30 jyldyq merekesimen tuspa-tus kelip otyrǵanyn bilemiz. Bul jyldary biz ornyqty ári saıası dıalog ornattyq. Turaqty túrde bizdiń elder ekonomıkalyq jáne áleýmettik baǵyttardy damytyp kelemiz», dedi ol.
Memleket basshysy Azııa óńiriniń resýrsy men ıntellektýaldyq áleýeti zor ekenin atap ótti.
«Bul óńirde mańyzdy kólik dálizderi men jyldam damyp jatqan naryq ornalasqan. Azııanyń álemdik ekonomıkadaǵy róli de arta tústi. Ol ınvestısııa men kapıtal tartylatyn jahandyq ortalyqqa aınaldy. Bul bizdiń elder arasyndaǵy ózara yntymaqtastyqtyń deńgeıin arttyrýǵa múmkindik beredi. Bul bárinen buryn saýda máselesine qatysty bolyp otyr.Ortalyq Azııa elderi men Úndistan arasyndaǵy taýar aınalym 2020 jyly 3 mlrd dollarǵa jetti. Onyń ishinde bul saýdadaǵy Qazaqstannyń úlesi 80 paıyzdy quraıdy», dedi Qasym-Jomart Toqaev.
