«Qazaqstanda elektrondyq úkimet tıimdi jumys isteýde, ekonomıkanyń barlyq júıe quraýshy sektorlaryn sıfrlandyrý, smart-qalalardy, medısına men bilim berýdi damytý jónindegi jobalar iske asyrylýda, sıfrlyq sheshimder bank-qarjy júıesinde tabysty qoldanylýda», dedi Qasym-Jomart Toqaev «Ortalyq Azııa - Úndistan» sammıtinde sóılegen sózinde.
Memleket basshysy búginde jasandy ıntellekt, Big data, ınternet-zattar, onlaın-kommersııa jáne kıberqaýipsizdik sııaqty salalardy damytý úlken suranysqa ıe bolyp otyrǵanyn aıtty. Budan basqa, Qazaqstanda telekommýnıkasııa, elektrondyq ónerkásip, sondaı-aq elektrondyq tehnıkanyń qurastyrý óndiristeri salasyndaǵy zerthanalardy qurý jónindegi jobalar qyzyǵýshylyq týdyrady.
«Biz osy baǵyttar boıynsha ózara tıimdi yntymaqtastyqqa daıynbyz. Úndi kompanııalaryn qazaqstandyq naryqqa shaqyramyz. Men Qazaqstan halqyna arnaǵan Joldaýymda 2025 jylǵa qaraı keminde 100 myń joǵary bilikti IT -mamandardy daıarlaý mindetin qoıdym. Osyǵan baılanysty bizge Úndistannyń tájirıbesi de, Úndistannyń IT jáne ınjenerlik kadrlardy oqytýdaǵy baı tájirıbesi de qyzyqty. Praktıkalyq qadam retinde «Astana Hub» halyqaralyq IT-startaptar tehnoparki bazasynda Bagmane tehnologııalyq parkimen jáne basqa da úndi IT-alyptarymen birge Ortalyq Azııa úshin ınjenerlik keńse men aqparattyq tehnologııalar mektebin ashýdy usynamyz», dedi Qasym-Jomart Toqaev.
