Aleksandr Tkachenko «Mobıl» saýda úıinde uıaly telefondardyń satylymymen aınalysqan. Jappaı tártipsizdikter kezinde onyń dúkeni tonalyp, astan-kesteni shyqty. Nátıjesinde kásipker 3,2 mln teńge kóleminde shyǵynǵa batty. Ol barlyq qajetti qujattardy rásimdegennen keıin, oǵan tolyq kólemde qarajat aýdaryldy.
Taǵy bir kásipker Árkenjan Myrzabaev «Azııa park» jáne «Maksıma» saýda úılerinde eki dúkendi jalǵa alyp, balalar kıimin satqan. Búliktiń nátıjesinde onyń bıznesine 1,8 mln teńge zalal keltirildi. Oǵan da ótemaqy qarajaty aýdaryldy.
Aldyn ala málimetter boıynsha, Almatyda tártipsizdik pen tonaý saldarynan 1581 kásipkerlik sýbektisi zardap shekken. Jalpy shyǵyn somasy 45,6 mlrd teńgeni quraıdy. Zalal somasyn aıqyndaý jónindegi óńirlik komıssııa zardap shekken obektiler boıynsha derekterdi jınaýdy jalǵastyrady.
Almaty ákimi Baqytjan Saǵyntaevtyń tapsyrmasyna sáıkes qala ShOB-qa birneshe baǵyt boıynsha qarjylyq jáne qarjylyq emes qoldaý kórsetedi. Zardap shekken bıznes sýbektileri jylytý, gaz, sýmen jabdyqtaý jáne káriz boıynsha kommýnaldyq shyǵyndardan úsh aıǵa bosatyldy. Sonymen qatar, qala menshigindegi úı-jaılardy jalǵa alatyn kásipkerler 6 aıǵa jalgerlik tólemnen bosatyldy.
