Az ınvazıvti artroskopııalyq ota 55 jastaǵy pasıentke qozǵalys erkindigin syılady

Sondaı naýqastardyń biri – Aqtaý qalasynan kelgen 55 jastaǵy Dına Qydyrova. Ol velosıpedten qulap, jaraqat alǵan.

«Men eshqashan aıaǵymnyń aýyrǵanyna shaǵymdanǵan emespin. Qazaq «Beınet aıaq astynan» deıdi. Qyrkúıek aıynda Býrabaıda demalysta boldym. Qalanyń qarbalasynan demalyp, densaýlyǵymdy túzeımin dep oıladym. О́kinishke qaraı, búginge deıin sol jerden alǵan jaraqattyń zardabyn tarttym. Velosıpedten quladym. Tizem kóz aldymda úlken doptaı isip ketti», dep eske alady Dına Qydyrova.

Emdelýshiniń aıtýyna qaraǵanda, jaraqat saldarynan júrýi qıyndap, uzaq ýaqyt boıy fızıoterapııalyq em alǵanymen esh nátıje bermegen kórinedi.

«Tizem qatty aýyrdy, jergilikti dárigerler dıagnoz qoıa almady. MRT-dan keıin ǵana dáriger menıskiniń jarylýy múmkin ekenin aıtyp, elordadaǵy Travmatologııa jáne ortopedııa ǵylymı ortalyǵyna ota jasatýǵa jiberdi. Artroskopııa jáne sporttyq jaraqat bóliminde maǵan ota jasaldy. Anestezııadan qatty qorqatynmyn. Biraq dárigerler óz isiniń kásibı mamandary eken. Barlyǵyn túsindirip, suraqtaryma jaýap berdi. MÁMS aıasynda tegin emdelý múmkindigine ıe bolǵanym úshin erekshe alǵys aıtamyn. Dárigerlerdiń qoldary altyn, qyzmetterine basymdy ıemin», dedi Dına Qydyrova.

Naýqastyń dárigeri Marat Orazov tize býynynyń tartylýy nemese synýy kezinde menıskiniń jarylýy jıi kezdesetin tize patologııasy ekenin aıtady. Mundaı jaraqat kezinde isiný jáne ótkir aýyrsyný bolady.

«Biz naýqasqa 21 qańtarda ota jasadyq. Operasııa 20 mınýtqa ǵana sozyldy. Kamera baqylaýyndaǵy eki pýnksııa arqyly az ın­va­zıvti artroskopııalyq ota jasaldy. Son­dyqtan sol jerde búkil býyndy, shemir­shek­tiń, baılamdardyń, usaq túıirshikterdiń jaǵ­daıyn tekserip, naýqastyń aýyrsynýyna ákeletin turaqsyz bóligin alyp tastadyq», dep túsindirdi dáriger.

Mundaı otalardyń artyqshylyǵy, pasıent kelesi kúni ózdiginen qozǵala alady. Qalpyna kelý merzimi 2 aıǵa sozylady, ıaǵnı qysqa ýaqyttan keıin pasıent qaıtadan aıaqtaryna ádettegideı júkteme salyp, júre alady.

Jalpy, Akademık N.J.Batpenov atyn­da­ǵy Ulttyq ǵylymı travmatologııa jáne ortopedııa ortalyǵynda ótken jyly MÁMS aıasynda barlyǵy 6 861 hırýrgııalyq ota tegin jasalǵan. Bul osynsha naýqastarǵa qozǵalys erkindigi men dertsiz ómir syılady degen sóz.