Qor konsýltatıvtik-dıagnostıkalyq qyzmet alý múmkindikteri týraly aqparat usynady. Beıindi maman-dárigerlerdiń konsýltasııalary, KT/MRT, rentgen jáne dıagnostıkalyq qyzmettiń basqa da túrleri MÁMS júıesinde saqtandyrylǵan azamattarǵa emdeýshi dárigerdiń joldamasy boıynsha tegin kórsetiledi. Olardan qosymsha aqy talap etilmeýi kerek. Eger emhana atalǵan qyzmetterdi ózi usyna almasa, onda oryndaý sharty boıynsha pasıenttiń basqa klınıkadan alýyn qamtamasyz etýge tıis. Mindetti áleýmettik medısınalyq saqtandyrý júıesi engizilgeli beri densaýlyq saqtaý salasyn qarjylandyrýdyń edáýir artýy kóptegen suranysqa ıe baǵyttar boıynsha medısınalyq kómek kólemin ulǵaıtýǵa múmkindik berdi.
Kez kelgen konsýltasııalyq-dıagnostıkalyq qyzmetti pasıentke emdeýshi dáriger taǵaıyndaıdy. Ol naýqastyń jaǵdaıyn, shaǵymdaryn, aýrýdyń belgilerin zerdeleıdi. Tıisti kórsetilimder bolsa dáriger KT, MRT nemese basqa da zertteýler júrgizýge joldama jazady. Qyzmetti josparly túrde alý úshin pasıent «Saqtandyrylǵan» mártebesine ıe bolýǵa tıis, óıtkeni emhana deńgeıinde bul qyzmetter MÁMS aıasynda kórsetiledi.
TMKKK sheńberinde jáne MÁMS júıesinde qyzmet kórsetetin medısınalyq uıym Áleýmettik medısınalyq saqtandyrý qorymen tıisti shart jasasady jáne pasıentterge osy qyzmetterdi usyný boıynsha mindettemeni oryndaýǵa tıis.
«Qor turǵyndarmen keri baılanys ornatyp, turaqty túrde jumys júrgizedi. 2021 jyly Nur-Sultan qalasy boıynsha 3 301 ótinish-shaǵym tústi, onyń 41,4%-y konsýltasııalyq-dıagnostıkalyq qyzmet boıynsha: mysaly, beıindi mamandarǵa, dıagnostıkalyq qyzmetterge jete almaý nemese ony uzaq kútý, sol sekildi ýchaskelik qyzmetterdi (jalpy praktıka dárigeri, terapevt-dáriger, pedıatr-dáriger), jedel medısınalyq kómek brıgadasyn uzaq kútý, t.b. Azamattardan «emhana kórsetilimder bolsa da, ótkizý múmkindiginiń joqtyǵyna silteme jasaı otyryp, konsýltasııalyq-dıagnostıkalyq qyzmetke jiberýden bas tartady» degen ótinishterdi jıi alamyz. Mundaı jaǵdaıda, qyzmet jetkizýshi qor bazasynda turatyn medısınalyq uıymdar qatarynan birlesip oryndaýshyny tartýǵa mindetti. Eger birlesip oryndaý sharty eshkimmen jasalmasa, onda pasıentti osy qyzmet túri boıynsha qormen kelisimshartqa otyrǵan medısına uıymdarynyń birine jiberýge tıis, joldama boıynsha kórsetilgen qyzmet qorytyndylary negizinde shart avtomatty túrde jasalady», dep túsindirdi «Áleýmettik medısınalyq saqtandyrý qory» KeAQ Nur-Sultan qalasy boıynsha fılıalynyń dırektory Nurlybek Qabdyqaparov.
Alaıda pasıent óz emhanasyna barmaı, basqa medısınalyq ortalyqtarǵa tikeleı baryp, konsýltasııalyq-dıagnostıkalyq qyzmetti aqyly alatyn jaǵdaılar da kezdesedi.
«Keıde biz áleýmettik jelilerden pasıentke joldama berilmegeni jáne olar aqyly túrde qyzmet alǵany (mysaly KT) týraly shaǵymdardy kóremiz. Mundaı jaǵdaılarda pasıenttiń quqyǵyn qorǵaýshy retinde qor iske qosylady. Biraq keıde tekserý nátıjesinde pasıent tipti óz emhanasyna júginbegen, biraq dereý basqa jerde aqyly tekserýden ótýge sheshim qabyldaǵany anyqtalyp jatady. Sondyqtan azamattardy TMKKK sheńberinde jáne MÁMS júıesinde medısınalyq qyzmetterdi paıdalanýǵa shaqyramyz. Eger problemalar týyndasa, aldymen emhananyń Pasıentti qoldaý qyzmetine habarlasyp, óz quqyqtaryńyzdy qorǵańyzdar», dep keńes beredi ÁMSQ elorda fılıalynyń dırektory N.Qabdyqaparov.
Áleýmettik medısınalyq saqtandyrý qory atap ótkendeı, 2022 jyly halyqqa kórsetiletin medısınalyq kómekti qarjylandyrýǵa 2,049 trln teńge, onyń ishinde TMKKK boıynsha – 1,2 trln, MÁMS boıynsha – 838 mlrd teńge baǵyttaý josparlanýda.
Bul rette konsýltasııalyq-dıagnostıkalyq qyzmetterdi qarjylandyrý edáýir artady. Osy maqsattarǵa 231 mlrd teńgeden astam, onyń ishinde MÁMS boıynsha – 187,7 mlrd teńgeden astam qarajat qarastyrylǵan. Salystyrmaly túrde qarasaq, bir jyl buryn atalǵan qyzmetterge 203 mlrd teńge baǵyttaldy, onyń ishinde 167 mlrd teńge – MÁMS boıynsha.
Eger sizde konsýltasııalyq-dıagnostıkalyq qyzmetterdi alýǵa qatysty másele týyndasa nemese atalǵan qyzmetterdiń kórsetilýine qol jetkize almasańyz, onda aldymen óz emhanańyzdyń Pasıentti qoldaý qyzmetine habarlasýyńyz qajet. Tomografııany nemese basqa da qyzmetterdi uzaq kútip, ótý múmkindigi bolmaǵan jaǵdaıda, densaýlyq saqtaý basqarmasynan jaǵdaıdy naqtylaı alasyz. Eger máseleni sol jerde sheshý múmkin bolmasa, onda Áleýmettik medısınalyq saqtandyrý qoryna ózińizge yńǵaıly tásilmen ótinish berińiz: fms.kz resmı saıty, 1406 baılanys ortalyǵy, Qoldau 24/7 mobıldi qosymshasy jáne Telegram-daǵy SaqtandyryBot.
