Úkimet úıinde «Nur Otan» partııasy Tuǵyrnamasynyń oryndalý barysy qaraldy

Búgin, 18 naýryz kúni   Premer-Mınıstr Serik Ahmetovtiń jetekshiligimen ótken selektorlyq rejımde «Nur Otan» partııasynyń saılaý aldy Tuǵyrnamasynyń 2013 jyl qorytyndysy boıynsha oryndalý barysy qaraldy. Bul týraly Qazaqstan Respýblıkasy Premer-Mınıstriniń baspasóz qyzmeti habarlady. Partııa Tóraǵasynyń birinshi orynbasary Baýyrjan Baıbek Memleket basshysynyń Qazaqstan halqyna Joldaýynda «Qazaqstan-2050» Strategııasyn júzege asyrýdyń basty maqsaty qazaqstandyqtardyń ómirin josparly túrde jaqsartý, al onyń negizgi ólshemi azamattardyń áleýmettik kóńil kúıi bolyp tabylatynyn atap kórsetti. «Partııa bıýrosynda Úkimetpen birlesip daıyndalǵan Tuǵyrnamany júzege asyrý kórsetkishteriniń tizbesi bekitildi. Kórsetkishterdiń 75 paıyzy naqty jáne turǵyndar úshin ólshemdi ındıkatorlarǵa baǵdarlanǵan. Olardy oryndaýǵa naqty memlekettik organdar bekitilgen»,-dedi B.Baıbek. Sondaı-aq táýelsiz áleýmettik saýaldamalar júrgizý jáne partııanyń qoǵamdyq qabyldaýlary bergen saraptamalar arqyly Tuǵyrnamany júzege asyrýdyń keshendi monıtorıngi tetigi engizildi, dep sózin tolyqtyrdy ol. Ekonomıka jáne bıýdjettik josparlaý mınıstri Erbolat Dosaev ótken jyly Tuǵyrnamanyń ekonomıkalyq blogynyń oryndalýy barysy týraly habarlady.Ol JIО́ ósimi byltyr 6 paıyzdy quraǵanyn, onyń josparly deńgeıge sáıkes bolǵanyn, JIО́-niń turǵyndardyń jan basyna shaqqanda 13 myń AQSh dollaryn quraǵanyn, 2013 jyly halyqtyń naqty tabysynyń, onyń aldyndaǵy jylmen salystyrǵanda 3 paıyzǵa, eńbek aqynyń 1,6 paıyzǵa óskenin, jumyssyzdyq deńgeıiniń 5,2 paıyzdy quraǵanyn aıtty.Bul máseleler boıynsha sondaı-aq birqatar mınıstrlikter men vedomstvolar basshylary, Shyǵys Qazaqstan men Batys Qazaqstan oblystarynyń ákimderi sóıledi. Eńbek jáne halyqty áleýmettik qorǵaý mınıstri Tamara Dúısenova Úkimettiń 2011 jyldan beri Jumyspen qamtý jol kartasyn júzege asyryp jatqanyn, osy kezeńde baǵdarlama 267 myń adamdy qamtyp, 157 myń adamnyń jumysqa ornalastyrylǵanyn atap ótti. Onyń aıtýynsha, baǵdarlamanyń negizgi ólshemderiniń biri jastardy qoldaý bolyp tabylady. Sonymen, Jumyspen qamtý jol kartasyna qatysýshylardyń 148 myńnan astamy 29 jasqa deıingiler bolyp otyr. Bilim jáne ǵylym mınıstri Aslan Sárinjipov 2013 jyly kolledj túlekteriniń jumysqa ornalasýy 70,5 paıyzdy quraǵanyn habarlady. BǴM basshysy «Respýblıka boıynsha oqý oryndary men kompanııalar, kásiporyndar arasynda tehnıkalyq jáne kásiptik oqý oryndaryn bitirýshilerdiń tájirıbeden ótýi men eńbekke ornalasýyn uıymdastyrý máseleleri boıynsha 25 myńnan astam kelisim-sharttar jasalǵanyn» atap kórsetti. «Áleýmettik eleýli máselelerdi sheshý- Úkimettiń,Parlament Májilisindegi partııalyq fraksııanyń jáne partııanyń barlyq qurylymdarynyń birlesken jumysynyń negizi bolyp tabylady. Nurotandyq depýtattar Úkimetpen birlesip ózara jemisti is-qımyl júrgize otyryp, ózderiniń zań shyǵarýshylyq qyzmetinde únemi saılaý aldy tuǵyrnama erejelerine arqa súıeıdi»,-dep málimdedi  Parlament Májilisindegi «Nur Otan» partııasy fraksııasy basshysynyń birinshi orynbasary Sergeı Dıachenko. «Bizge kókeıkesti tapsyrmalar berip otyratyn Memleket basshysy ásirese, «Nur Otan» partııasynyń sońǵy sezinde aldymyzǵa úlken mindetter qoıdy. Biz bul jaýapkershilikti sezinýimiz jáne osy tapsyrmalardy oryndaýǵa baıyppen qaraýymyz kerek»,-dedi jıyndy qorytyndylaı kele Serik Ahmetov. «Tuǵyrnama kórsetkishterin aktýaldandyrý qajet. Onyń syrtynda, Tuǵyrnamada kórsetilgen, áleýmettik mindettemelerdi oryndaý sheńberinde ekonomıkadaǵy jaǵdaılardyń ózgerýin esepke alý kerek»,-dep atap kórsetti Serik Ahmetov. Úkimet basshysy ortalyq jáne jergilikti atqarýshy organdarǵa EBJM-men kelisim boıynsha Tuǵyrnamany aktýaldandyrý jóninde «Nur Otan» partııasy apparatyna bir aı merzim ishinde usynys engizýdi, sondaı-aq ony monıtorıngteý men júzege asyrý boıynsha jumystardy jalǵastyrýdy tapsyrdy. Derekkóz: www. Primeminister.kz. Foto: www. Primeminister.kz.