Izdeýde júrgen Elena Danılova elimizge jetkizildi

Búgin Qazaqstan Respýblıkasy Bas prokýratýrasynyń suratýy boıynsha Birikken Arab Ámirlikterinen «Qazaqstan menedjment, ekonomıka jáne boljaý ınstıtýty» AQ-nyń burynǵy bas býhgalteri Elena Danılova ekstradısııalandy. Ol 14 mıllıonnan astam teńgeni urlady dep aıyptalýda. Bul týraly Bas prokýratýranyń baspasóz qyzmeti habarlady. E.Danılova Qazaqstannan tys jerde jasyrynýyna baılanysty oǵan Interpol boıynsha izdeý jarııalandy.Izdestirý is-sharalarynyń nátıjesinde 2011 jyldyń mamyrynda Danılovanyń Birikken Arab Ámirlikteriniń aýmaǵynda ekeni anyqtaldy. Osyǵan baılanysty Qazaqstan Respýblıkasynyń Bas prokýratýrasy ony berý týraly suratý joldady. 2013 jyly Birikken Arab Ámirlikteriniń Ádilet mınıstrligi kúdiktini qylmystyq jaýapkershilikke tartý úshin Qazaqstanǵa ekstradısııalaý týraly sheshim shyǵarǵan bolatyn. Birikken Arab Ámirlikterinde Danılovanyń múddelerin bir top advokat qorǵady jáne olar berý týraly qazaqstandyq suratýdy qanaǵattandyrýdan bas tartýǵa qol jetkizbekshi boldy. Olardyń shaǵymdary boıynsha Qazaqstannyń Bas prokýratýrasy arabtar tarapyna birneshe ret qosymsha materıaldar usyndy. Qazaqstan Respýblıkasynyń Bas prokýratýrasy men Interpol bıýrosynyń ulttyq ortalyǵy, Ishki ister mınıstrligi jáne ózge de múddeli vedomstvolardyń úılesimdi jumysynyń nátıjesinde E.Danılova Ábý-Dabıden Almatyǵa áýe reısimen jetkizilip, ýaqytsha ustaý abaqtysyna qamaldy. Ámirhan Almaǵanbetov. Derekkóz: Bas prokýratýranyń baspasóz qyzmeti Foto: Munara.kz.