«Bolashaq» baǵdarlamasy boıynsha álemniń bedeldi ýnıversıtetinde sapaly bilim alyp, elimizdegi ınnovasııalyq bilim platformalarynda jumys istep, tájirıbe jınap, qazirgi ýaqytta týǵan jerim Aqtóbede Q.Jubanov ýnıversıtetin basqarý senimine ıe bolýym – jastarǵa berilgen mol múmkindik pen qoldaýdyń kórinisi. Men sııaqty memleket qoldaýymen ósip-órkendep, endi sol ınvestısııany elge adal qyzmet etý arqyly óteýge daıyn jastar kóp.
Jaqynda ótken Nur Otan partııasynyń kezekten tys HHI sezinde sóılegen sózinde el Prezıdenti Qasym-Jomart Toqaev jastardy paıdaly qoǵamdyq qyzmetke tartýdyń, sondaı-aq Qazaqstandaǵy jumyspen qamtý jáne bilim berý salasyndaǵy jobalarǵa qoljetimdilikti keńeıtýdiń mańyzdylyǵyna toqtaldy.
О́zim qyzmet etetin Q.Jubanov atyndaǵy Aqtóbe óńirlik ýnıversıteti – elimizdegi eń iri óńirlik joǵary oqý oryndarynyń biri. Búginde ujymymyzdyń aldynda akademııalyq sapa standarttaryn odan ári jetildirý, bilim berý mazmunyn jańartý, ǵylymdy jan-jaqty qoldaý, basqarý prosesterin transformasııalaý jáne sıfrlandyrý, sol arqyly elimizdiń, Aqtóbe óńiriniń, sondaı-aq joǵary bilimniń damýyna aıtarlyqtaı úles qosý mindeti tur. Atalǵan mańyzdy ózgeristerdi júzege asyrýda stýdentter úlken ról atqarady. Ýnıversıtetimizdegi Stýdenttik parlament pen otyzdan asa jastar klýby men uıymǵa jan-jaqty qoldaý kórsetý únemi nazarda.
Sonymen qatar qazirgi tańda ótkiziletin is-sharalardyń sanynan góri mazmuny men sapasyna basymdyq berýdiń jáne túrli baǵyttaǵy jumystardy ortaq tujyrymdamaǵa negizdeýdiń mańyzy artyp otyr. Tek ýnıversıtet qaýymdastyǵy úshin ǵana emes, qala men óńirdiń damýyna aıtarlyqtaı úles qosýǵa yntaly eriktiler qozǵalysy belsendi túrde damyp keledi. Aldaǵy ýaqytta eriktilik pen qoǵamǵa paıdaly qyzmet etý Jubanov ýnıversıtetiniń ár stýdentiniń oıynda bolsa deımin.
Ýnıversıtetimizde 15 myńnan asa stýdent bilim alyp jatyr. Árıne, jaqsy oqý úlgerimin kórsetip, óz áleýetin tolyq damytý úshin stýdentterdiń emosıonaldy kúıi ornyqty bolýy kerek. Stýdentterimizdiń jaılylyǵy men tynyshtyǵyn qamtamasyz etý maqsatynda osy oqý jylynda eń joǵary standarttarǵa saı kásibı psıholog mamandardy jumyldyryp, psıhologııalyq ortalyq ashtyq. Psıhologııalyq ortalyq Qazaqstandaǵy Psıhoanalız ortalyǵymen tyǵyz baılanysta jumys istep otyr.
Stýdentter men jas mamandarǵa «Elimiz jasap otyrǵan múmkindikterdi jasampazdyqqa jumsap, sapaly bilim alyńyz jáne elimizdiń erteńi men búgini úshin jaýapkershilikti ózińnen basta!» degim keledi. Elimizdiń birlik-berekesin arttyrýǵa birge jumylaıyq!
Laýra QARABASOVA,
Q.Jubanov atyndaǵy
Aqtóbe óńirlik ýnıversıtetiniń rektory
Aqtóbe
