Ony túbirimen qozǵamasań, betinen qalqyp sheshý qıyn. Sosyn sándi kabınette otyryp ótkizetin jınalystar qaptady. Árıne, ondaı jınalys kerek emes demeımin, kerek te shyǵar. Biraq kil sheneýnik, mınıstrler ústel basynda bir-birine jaǵymdy sóz aıtyp, bir-birin maqtap, sonymen jıyn da aıaqtalady. Al qarapaıym halyq turmystyq túıtkildermen betpe-bet qala beredi.
Sodan soń partııanyń basynda otyrǵan azamattar bir-birine múlde syn aıtpaıdy. Syn aıtsa, jaý kóredi. Syn degen jumystyń túzelýi úshin aıtylady. Syn aıtyldy ma, demek olqy soǵyp turǵan tusyn túze de, ári qaraı jumysty jalǵastyra ber. Bul jerde basqa qısyn joq. Sondyqtan partııa endigi kezekte synǵa daıyn bolýy kerek, synnan qorytyndy shyǵara bilýi kerek dep sanaımyn. Syndy jany ashyǵandyqtan aıtady.
Jańarǵan partııamen tize qosyp jumys isteýge daıynbyz. Buryn da jumys istep keldik. Degenmen endi jumys taktıkasy ózgerýi kerek degen oıdamyn. Partııa úkimettik emes uıymdardyń, azamattyq qoǵam ókilderiniń kózqaras, usynysyna qulaǵyn túrse, birigip jumys atqarsa, sózsiz nátıje bolady. О́z kezegimizde biz de kásibı tájirıbemizdi, aqyl-keńesimizdi usynýǵa daıynbyz. Taǵy bir aıta keterlik jaıt, byltyr partııa praımerız ótkizdi. Sonda shynymen elge jany ashıtyn, qolynan is keletin qanshama azamat sońǵy tizimnen tys qaldy. Sońynda partııa úshin júgirgen, qaıtsem elge paıdamdy tıgizemin degen bilikti mamandardyń senimine selkeý tústi, kóńilderi soqpaı qaldy. Túńildi. Endigi kezekte partııa tarapynan mundaı ádiletsiz áreketter bolmaıdy, el men halyq múddesi ár kez birinshi orynda bolady dep senemiz.
Partııa eldiń ıdeologııalyq tiregine aınalýy kerek. Ekonomıka, bıznes máseleleri partııasyz da sheshiledi. Onymen aınalysatyn Úkimet, salalyq mınıstrlikter bar. Menińshe, partııa jumysy birinshi kezekte ıdeologııalyq máselelerge baǵyttalǵany jón. Nur Otan tizginin ustap otyrǵan azamattar kabınetterinen shyqsa, halyqty kútpeı, ózderi halyqqa barsa, máselelerin tyńdasa, halyqpen sol halyqtyń tilinde sóılesse, muń-muqtajdaryn eskerip, shyn peıilmen sheshýge kirisse degen tilek bar. Sonda ǵana partııanyń tirligi jandanady, jumysyna qan júgiredi, halyqtyń senimi oıanady.
Serik SANAÝBAEV,
Qaraǵandy oblystyq kásipkerler qaýymdastyǵynyń atqarýshy dırektory
