Jekeleı synda jarys jolyna shyqqan birde-bir jerlesimiz bıylǵy Australian Open dodasynda jankúıerlerdiń kóńilinen shyǵatyndaı oıyn kórsete almady. Tek juptyq básekede kortqa shyqqan Anna Danılına ǵana fınaldyq kezeńge deıin jetip, Aýstralııada mereıimizdi asyrdy. Brazılııalyq Beatrıs Haddad Maııamen birge jup qurap oınaǵan jerlesimiz óziniń sporttyq karerasynda tuńǵysh ret «Úlken dýlyǵa» týrnıriniń fınalynda óner kórsetýge múmkindik aldy. Degenmen sheshýshi sátte bala kezderinen jup qurap oınap júrgen asa tájirıbeli chehııalyqtar basym tústi.
Naqtylaı aıtsaq, Danılına men Maııa fınalda osy týrnırdiń birinshi raketkalary sanalatyn chehııalyq Barbora Kreıchıkova jáne Katerına Sınıakovamen kezdesip, úsh set qorytyndysy boıynsha 2:1 esebimen jeńilip qaldy. Qazaqstandyq-brazılııalyq jup alǵashqy partııany 7:6 esebimen óz paıdalaryna jazdy. Ekinshi sette chehııalyqtar ese qaıtaryp úlgerdi – 6:4. Sońǵy, sheshýshi sette Barbora men Katerına jeńisti julyp aldy – 6:4. Osylaısha, qazaqstandyq tennısshiler arasynda alǵashqy bolyp Aýstralııa birinshiliginiń fınalyna deıin jetken A.Danılına búgingi álemdik reıtıngte juptyq synda úzdik 25 tennısshiniń qataryna kirdi.
Qazaqstandyq-brazılııalyq jup bıylǵy maýsymda alǵash ret birge oınap, bir aıdyń ishinde eki birdeı jarystyń fınalynda júldege talasty. Qańtar aıynyń ortasynda olar Sıdneı WTA 500 týrnırinde úzdik shyqqan bolatyn. Sıdneıde qazaqstandyq-brazılııalyq jup 4 matchtyń úsheýinde sýper taı-breıkte qarsylastaryn tize búktirdi. Al Melbýrnde 5 kezdesýiniń tórteýinde úshinshi, sheshýshi sette jeńisti julyp aldy. Bir aıta keterligi, chehııalyq tennısshiler fınalǵa deıin qarsylastaryna birde-bir set bergen joq. Olar 2018 jyly Fransııa ashyq chempıonaty men Ýımbldon jarysynda da qarsylas shaq keltirmese, byltyr Rolan Garros pen Gvadalaharada WTA qorytyndy týrnıriniń jeńimpazdary atandy. Sonymen qatar chehııalyqtar byltyrǵy Tokıo Olımpıadasynda da jeńis tuǵyrynan kórindi.
