Áriptestik álippesi

Shyǵys Qazaqstan oblysy ǵylymı ıntegrasııanyń damýyna aıryqsha den qoıyp otyr. Jaqynda oblys ortalyǵynda Ulybrı­­tanııa men Qazaqstan arasyndaǵy ǵylymı yqpaldastyq sheńberinde «Ǵylymı zertteýlerdi baǵalaý jáne irikteý júıesi. Zertteýshilik qyzmettegi áriptestikti nyǵaıtý» atty halyq­aralyq semınar ótti. Oǵan elimizdiń túkpir-túkpi­rinen 300-den asa jáne brıta­nııa­lyq ýnıversıtetterdiń 15 jetekshi zertteýshi-ǵalymdary keldi. Bi­lim jáne ǵylym mınıstr­­liginiń qol­daýymen Ulttyq ǵylymı-teh­nıkalyq saraptama ortalyǵy jáne Brıtanııa keńesiniń (British Council) uıymdastyrýymen eli­mizde alǵash ret О́skemende ót­ken semınar jumysynda eki el arasyndaǵy ǵylymı ıntegrasııa ıgilikteri men mıneraldy baılyq kózderin tıimdi paıdalaný boıynsha áriptestikti damytý máseleleri qaraldy. Memleket basshylarynyń ke­lissózderine sáıkes, eki el ara­syn­daǵy ǵylymı yqpaldastyq odan ári damýǵa bet alǵanyn baıqatatyn jıynda mınıstrliktiń Ǵylym komıteti tóraǵasynyń orynbasary Amandyq Tóleshov sóz aldy. Ol halyqaralyq sharanyń tuńǵysh ret Shyǵys Qazaqstan oblysynda ótip jatqanyn, Elbasynyń ǵylymdy ekonomıkanyń basty damytýshy kúshine aınaldyrý jónindegi tapsyrmalaryn júzege asyrý úshin Ulttyq ǵylymı-tehnıkalyq saraptama ortalyǵy qurylǵanyn atap ótti. Qazirgi kezde atalǵan ortalyqta ǵylymı jańalyǵy bar jobalardy júzege asyrý tetikteri qalyptasýda. Aldaǵy eki jylda komıtet bes basym qa­ǵıdat boıynsha jumys isteıtin bolady. Máselen, ónerkásiptik ınnovasııalar men sınhrondylyq qaǵıdaty ǵylymı jańalyqtardyń jergilikti óndiriske beıimdiligin talap etedi. Bul ındýstrııalandyrý baǵdarlamasy aıasyndaǵy granttardyń berilýine jol ashady. Infraqurylymdy damytý ustanymy boıynsha ǵylymı jáne ınjenerlik zerthanalar ashylyp, tehnoparkter júıesi qa­lyptaspaq. Ǵylymı qyzmettiń qarjylandyrylýyn jetildirý de kózdelip otyr. Atalǵan baǵyt boıynsha jergilikti óndiriske tikeleı qatysy bar ǵylymı jobalardyń 25 paıyzyn kásipkerlik nysan­dary qarjylandyrady. El eko­no­mıkasynyń strategııalyq ba­ǵyttaryna qyzmet etetin qazaq ǵylymyndaǵy granttarǵa jasy 35-ten aspaǵan zertteýshiler tartylatyn bolady. Brıtanııa keńesiniń dırektory Saımon Ýılıams Ulybrıtanııada daryndy ǵalymdardy qoldaıtyn halyqaralyq Nıýton qory qury­lyp jatqanyn, bul uıym Qa­zaqstandy da qamtıtynyn jetkizse, «Nazarbaev Ýnı­versı­teti» jer ǵylymdary ortalyǵynyń dırektory Asqar Munara elimizde geologııalyq ınfraqurylym qaıta túzilip, zamanaýı zerthanalar ashý josparlanyp otyrǵanyn aıtty. Bul – jas ǵalymdardyń geologııa salasyna bet burýyna, monoqalalardyń damýyna da oń áser etedi dep kútilýde. Eki el arasyndaǵy ǵylymı yqpaldastyqtyń artýyna otan­dyq ǵalymdar da, brıtandyq zertteýshiler de múddeli. Halyqaralyq shara barysynda meımandar óńirdiń jetekshi kásiporyndary men iri ken oryndarynda boldy. Dýman ANASh, «Egemen Qazaqstan». Shyǵys Qazaqstan oblysy.