Sýretti túsirgen Erlan OMAR, «EQ»
Ulybrıtanııa, Germanııa, Japonııa, Italııa, Polsha, Lıtva, Izraıl jáne Reseıdiń jetekshi klınıkalarynda medısınalyq kadrlardy oqytý baǵdarlamasy 2017 jyldan beri iske asyrylyp keledi. Dárigerler negizinen onkologııa, kardıologııa, kardıohırýrgııa, neırohırýrgııa, medısınalyq ońaltý jáne gınekologııa sııaqty basym baǵyttar boıynsha bilim alýda.
Sońǵy bes jyl ishinde ǵana 5 571 medısına qyzmetkeri bilimin ushtady. Sonymen qatar 336 dáriger shetelde biliktiligin arttyrǵan. 2021 jyldyń ózinde Izraıl, Polsha, Reseı klınıkalarynda 65 maman bilim aldy. Densaýlyq salasyna bólingen qarjy da az emes. Jalpy, medısınaǵa 27 mlrd teńge baǵyttalǵan. Qarjynyń basym bóligi koronavırýs ınfeksııasymen kúresýge jumyldyryldy.
Vırýstyń betin qaıtarýdaǵy basty jáne birden-bir tıimdi kúres – vaksınalaý ekeni anyq. Osyǵan oraı oblysta 343 egý kabıneti ashylǵan. Aýylda jyljymaly pýnktter men mobıldi keshender uıymdastyryldy. Vaksınalaý deńgeıi boıynsha Shyǵys Qazaqstan oblysy elimizdiń basqa óńirleri arasynda kósh bastap tur.
О́ńirde 39 kovıdtik bólimshede qajetti oryn sany tolyǵymen qamtamasyz etilgen. Medısınalyq uıymdarda dárilik zattar men jeke qorǵaný quraldarynyń qory da jetkilikti. 18 kompıýterlik tomograf, 67 rentgen apparaty, 370 ókpeni jeldetý apparaty jumys isteıdi. Al PTR testileý 20 zerthanada júrgiziledi. Sońǵy bes jyl ishinde halyqaralyq standarttarǵa sáıkes 3 myńnan astam zamanaýı jabdyq satyp alyndy. Jedel járdem avtokólikteriniń parki 216 birlikke jańartyldy.
Basa aıta keterligi, radıofarmpreparattar óndirýden bastap radıonýklıdtik dıagnostıka men terapııa júrgizýge deıingi tolyq sıkldy qamtıtyn ıadrolyq medısınalyq ortalyq iske qosyldy. Radıonýklıdtik terapııa bólimshesi elimizde sanaýly ǵana. Sondaı-aq oblys ortalyǵynda mamologııa jáne gınekologııa reanımasııasy bólimshesiniń operasııalyq blogi jańǵyrtyldy.
Densaýlyq salasyna jan-jaqty kóńil bólinip jatqanymen, koronovırýs ınfeksııasynyń taralýy azaıar emes. 28 qańtardaǵy esepteýge súıensek, óńirde koronovırýs juqtyrǵan 451 jaǵdaı tirkeldi. Onyń ishinde 390 sımptomdy, 61 sımptomsyz jaǵdaı anyqtaldy. Al stasıonarlarda atalǵan ınfeksııaǵa shaldyqqan 311 naýqas em alyp jatyr.
«Aýyryp em izdegenshe, aýyrmaýdyń jolyn izde» demekshi, revaksınalaý jumystary qolǵa alynǵanyn aıttyq. Jýyrda oblysqa «Spýtnık-Lite» vaksınasynyń alǵashqy partııasy da kelip tústi. Qazirgi ýaqytta reseılik koronavırýsqa qarsy preparattyń partııasy oblystyń medısınalyq uıymdaryna taratylyp jatyr. Jaqyn arada vaksına barlyq emhanada halyqqa qoljetimdi bolady. Bul týraly densaýlyq saqtaý basqarmasynyń baspasóz hatshysy Ásem Seksenova habarlady.
Eske sala ketsek, «Spýtnık-Lite» ekpesi koronavırýsqa qarsy vaksınalaýdyń tolyq kýrsynan keıingi revaksınalaýǵa arnalǵan. Revaksınalaý ekpe alýdyń tolyq kýrsynan keıin alty aıdan soń júrgiziledi. Dárigerlerdiń aıtýynsha, «Spýtnık-Lite» preparatynyń quramy «Spýtnık-V» ekpesiniń birinshi komponentine uqsas.
– 17 qańtarǵa deıin bizge 15-20 adam ǵana júginip, atalǵan aýrý anyqtalǵan. Al qazir bizge kúnine 80-ge jýyq naýqas keledi. Mobıldi brıgadalardyń qońyraýlary da artty. Sondyqtan antıdenelerdiń deńgeıi tómendemeýi úshin halyqty revaksınalaýdan ótýge shaqyramyn, – deıdi ambýlatorııalyq ortalyqtyń jalpy praktıka dárigeri Ińkár Mantaeva.
Densaýlyq saqtaý basqarmasynyń málimetinshe, Shyǵys Qazaqstanda 154 myńnan astam adam revaksınalaýdan ótken. Jasóspirimderdi, júkti jáne bala emizetin áıelderdi vaksınalaý jalǵasyp jatyr. Osy sanatqa jatatyn 170 myńnan astam adam Comirnaty Pfizer vaksınasyn aldy. Bul rette preparat 60 jastan asqan adamdar men medısına qyzmetkerlerine revaksınalaý úshin qoljetimdi.
О́ńirde indettiń beti qaıtpaǵandyqtan, barlyq sanıtarlyq talaptar saqtalýǵa tıis. Osy ýaqytqa deıin onlaın formatta oqyǵan oqýshylar 31 qańtardan bastap, dástúrli túrde mektepke baratyn bolady. Degenmen saqtyq sharalaryn bosańsytýǵa bolmaıdy.
Shyǵys Qazaqstan oblysy
