Elordada abattandyrý maýsymy bastalysymen jóndeý jumystaryna kirisý úshin qazirdiń ózinde qala turǵyndarymen kezdesýler ótkizilýde. Kezdesýde árbir adam aldaǵy ýaqytta salynatyn aýlalar men qoǵamdyq keńistikter, saıabaqtar, gúlzarlar men jelekjoldardyń tujyrymdamasy boıynsha óz ıdeıalary men usynystaryn usyna alady.
Jyl basynan beri aýdandyq ákimdikterdiń barlyǵy Ýrbanıstıka ortalyǵymen birlesip qala turǵyndarymen, onyń ishinde eldi mekenderdiń turǵyndarymen kezdesýler ótkizdi. Mysaly, 19 qańtarda Baıqońyr aýdanynyń ákimi, qalalyq máslıhat depýtattary aýdannyń belsendi turǵyndarymen kezdesti, onda aýla aýmaqtaryn abattandyrý máseleleri qaraldy. 29 qańtarda Aıdarly, Qusmuryn 2, Jeti jol jáne K.Baıseıitov kóshesi 105, 107 turǵyndarymen aýla keńistikterin abattandyrý máseleleri talqylandy.
Sonymen qatar, bmx, parkýr, skeıtbordıng jáne frıstaıl sııaqty ekstremaldy sport túrleriniń kásibı sportshylarymen kezdesý ótti. Osylaısha, qalada ekstrım-sportty súıetinder úshin tartymdy úsh oryn ashý josparlanyp otyr. Skeıt-parkter qurý jobalary raıderler men skeıtbordshylardyń pikirin eskere otyryp júzege asyrylady.
«Bul kezdesýler óz tıimdiligin dáleldep, ózara baılanysty jaqsartýda. Mysaly, turǵyndardyń qatysýymen ázirlenetin, engiziletin jáne iske asyrylatyn «Halyqtyq qatysý bıýdjeti» jobasyn alaıyq. Joba aıasynda qala turǵyndary aýlalar men qoǵamdyq keńistikterdi abattandyrý boıynsha óz ıdeıalaryn usyna alady. «Halyqtyq qatysý bıýdjeti» jobasy alǵash ret Saryarqa aýdanyna engizildi. Biz is júzinde jobanyń bar ekenin jáne turǵyndar oǵan qatysýǵa daıyn ekenin kórdik. Osy sebepti «Halyqtyq qatysý bıýdjeti» jobasy qalanyń basqa aýdandarynda da engizildi», dedi qalalyq Ýrbanıstıka ortalyǵynyń basshysy Elnar Bazyken.
Árbir aýdanda qala turǵyndary, Ýrbanıstıka ortalyǵynyń jáne ákimdik qyzmetkerleri kiretin jumys toptary qurylýda. Tujyrymdamany talqylaǵannan keıin jobany iske asyrý qolǵa alynady. Joba men konkýrs týraly tolyq aqparatty aýdandyq ákimdikterdiń resmı saıttarynan alýǵa bolady.
Elorda ákimi Altaı Kólginov atap ótkendeı, shaǵyn aýdandar men eldi mekenderdiń turǵyndary kezdesý barysynda negizinen aýla aýmaqtary men qoǵamdyq keńistikti abattandyrý máselesin qozǵaıdy. Osylaısha, sońǵy jyldary «Nur-Sultan – jaıly qala» master-jospary aıasynda elordada 500-den astam aýla men qoǵamdyq keńistik (saıabaqtar, gúlzarlar, jelekjoldar) salyndy jáne abattandyryldy. Qalanyń oń jaq bóligi men eldi mekenderge basa nazar aýdaryldy.
Memleket basshysy abattandyrý jumysynda «Halyqtyq qatysý bıýdjetiniń» úlesin arttyrýdy tapsyrdy.
