Zeınetaqy jınaqtarynyń negizgi somasy mindetti zeınetaqy jarnalary esebinen qalyptasqan – 12,7 trln teńge. Bir jyldaǵy ósim – 1 paıyz. Al mindetti kásiptik zeınetaqy jarnalary bir jylda 15 paıyzǵa ulǵaıǵan – 361 mlrd teńge. Erikti zeınetaqy jarnalary boıynsha 1,7 mlrd teńge jınaqtalǵan.
Byltyr qor salymshylary 2020 jylmen salystyrǵanda 1,5 ese kóp qarajat salǵan. Osy jyldyń 1 qańtaryndaǵy jaǵdaı boıynsha 2021 jyldyń 12 aıynda salymshylardyń shotyna shamamen 1,3 trln teńge jarna túskeni belgili boldy. Bul 2021 jyldyń sáıkes kezeńindegi kórsetkishten 255,7 mlrd teńgege kóp. Jarnalardyń jalpy kóleminiń 95,8 paıyzy mindetti zeınetaqy jarnalaryna tıesili – 1,3 trln teńge, sońǵy 12 aıdaǵy ósim – 24 paıyz. Mindetti kásiptik zeınetaqy jarnalarynyń kólemi – 55,6 mlrd teńge (ósim 19 paıyz). Erikti zeınetaqy jarnalary 799 mln teńgege teń (ósim 48 paıyz).
Zeınetaqy jınaqtarynyń ósýine taza ınvestısııalyq tabys ta aıtarlyqtaı úles qosqan. Bul rette taza ınvestısııalyq tabys 2021 jyldyń 1 qańtary men 2022 jyldyń 1 qańtary aralyǵynda 1,4 trln teńgege jetken. Bul budan bir jyl burynǵy kórsetkishten 138,2 mlrd teńgege nemese 11 paıyzǵa kóp. Ulttyq banktiń basqarýyndaǵy BJZQ zeınetaqy aktıvteriniń 2021 jyldyń basynan bergi kiristiligi 11,13 paıyzdy qurady. Al dál osy aralyqtaǵy ınflıasııa 8,4 paıyzǵa teń.
2022 jyldyń 1 qańtaryndaǵy jaǵdaı boıynsha qordaǵy jeke zeınetaqy shottarynyń sany 11,7 mln birlikke jetti. Shottardyń eń kóp mólsheri mindetti zeınetaqy jarnalary boıynsha ashylǵan – 10 871 285. Mindetti kásiptik zeınetaqy jarnalary esebinen qalyptasqan shottar sany – 547 136. Erikti zeınetaqy jarnalary esebinen 61 604 shot ashylǵan.
Jyl basynan beri BJZQ salymshylaryna 2,9 trln teńge tólendi. Onyń basym bóligi turǵyn úı jaǵdaıyn jaqsartý jáne emdeý maqsattaryna arnalǵan birjolǵy zeınetaqy tólemderine tıesili – 2,6 trln teńge. Jasyna baılanysty tólemder 101,4 mlrd teńgeni qurady. Saqtandyrý uıymdaryna 60,5 mlrd teńge aýdarylǵan. Muragerlik tólemder 57,5 mlrd teńgeni qurady. El aýmaǵynan tysqary jerge turaqty turýǵa ketkenderge 41,3 mlrd teńge úlestirilgen. Jerleýge arnalǵan tólemder 5,4 mlrd teńgeni, al múgedektik boıynsha tólemder 2,2 mlrd teńgeni qurady.
Keste boıynsha BJZQ-dan alynǵan aı saıynǵy ortasha tólem somasy (zeınet jasyna tolýyna baılanysty) 28 471 teńgeni, al aı saıynǵy eń joǵary tólem somasy 707 326 teńgeni qurady.
