Iá, ońaı bolmady. Serik pen Gaýharııa búldirshin qyzdaryn tańnyń eleń-alańynan qaladan toǵyz shaqyrym jerdegi taýǵa jattyǵýǵa aparady. Odan keıin sabaqtan qalmaý kerek. Alǵashqy bapkeri S.Aksenov, odan keıingi ustazy V.Sokolov myqty jattyqtyrýshy boldy, bilgenderin jalyqpaı úıretti. Ata-anasy, qysqasy, Aıaýlymnyń bıik nátıjege jetýi úshin 17 jyldan beri qyzdarymen birge ter tógip keledi. Shirkin, kez kelgen ata-ana balalarynyń sportta bıik tabystarǵa jetýi úshin Serik pen Gaýharııa sııaqty qulshynys pen jiger tanytqanda, Olımp shyńyn baǵyndyrǵan qazaq qyzdary molaıa túser edi-aý degen oıǵa qalasyz.
Phenchhan Olımpıadasyna barý úshin Aıaýlym talaı synnan múdirmeı ótti. Fınlıandııanyń Rýka, Qytaıdyń Taıbý, Kanada men AQSh-tyń birneshe qalasynda ótken Álem kýbogy kezeńderine qatysty. Munyń aldynda ol Aýstrııanyń Krıshpel qalasynda ótken Eýropa kýbogynyń kezeńinde eki birdeı altyn medal ıelendi. Shveısarııanyń Prato Leventıno qalasynda jalaýy jelbiregen kýbok jarysynda da jeńis tuǵyryna kóterildi. Sol joly Aıaýlym 3 altyn, 1 kúmis, 1 qola medal ıelenip, Eýropa kýbogynyń bas júldesi men Hrýstal kýbokty ıelendi.
Aıaýlymnyń Phenchhandaǵy ónerin ákesi Serik ekeýmiz birge tamashalaǵan edik. Qanaty qataıyp, tájirıbesi molaıǵan qazaqtyń qarshadaı qyzy jaman nátıje kórsetken joq. Alǵashqy jıyrmalyqtan oıyp turyp oryn aldy. Elge oralǵan soń oqýyn jalǵastyrdy. Orta mektepti altyn medalmen bitirip, Almatydaǵy Qazaq sport jáne týrızm akademııasyna oqýǵa tústi. Ol óziniń ekinshi Aq Olımpıadasyna barý úshin de «tar jol, taıǵaq keshýden» ótti. Eýropa men muhıttyń ar jaǵyndaǵy Álem kýboktaryna qatysyp, upaı jınaı berdi. Jýyrda Qazaq eli atynan Qytaıda óner kórsetýge joldama alǵan bes sańlaqpen birge attanyp ketti.
– Aıaýlym sábı kezinen ójet, alǵyr bolyp ósti. Ol dombyra, bı úıirmelerine de qatysty. Aǵylshyn tilinde erkin sóıleıdi. Keshe bizben sóılesti, olar turyp jatqan jer sál salqyndaý bolsa da, sportshylarǵa barlyq jaǵdaı jasalǵan eken. Tártip qatal, shydaý kerek degendi aıtty. «Frıstaıl mogýldan áriptesterim qaıtkende de bir medal alýǵa tyrysady», dedi. Qyzyma ǵana emes, Qazaq eliniń barlyq sportshysyna tabys tileımin. Átteń, pandemııa bolmaǵanda Aıaýlymǵa Beıjińge baryp, jankúıer bolar edim, – deıdi S.Ámirenov.
Ońdasyn ELÝBAI,
jýrnalıst
О́SKEMEN
