О́ńirde jappaı tártipsizdik pen qarýly shabýyl kezinde jalpy 18 ǵımarat, 147 avtokólik, (onyń 119-y memlekettik) búlinip, «M-Lombard», «Aqmergen» ańshylyq dúkenderi tonalǵan. Buzaqylar ishki ister organynda saqtaýda turǵan qarý-jaraqtardy ıelený úshin polısııanyń oblys ortalyǵyndaǵy 3 ǵımaratyna qarýly shabýyl jasapty.
Departament basshysynyń orynbasary 210 adamnyń dene jaraqattarymen aýrýhanalarǵa kóringenin atap ótti. Jalpy, Qazaqstan Respýblıkasynyń Qylmystyq kodeksiniń kisi óltirý, terrorıstik akti, jappaı tártipsizdik, qaraqshylyq, bılik ókiline kúsh qoldaný sekildi baptary boıynsha 59 qylmystyq is tirkelip otyr.
– Jappaı tártipsizdik jáne qarýly shabýyl qylmysyna qatysy bar degen kúdikpen 99 adam ustalyp, olarǵa advokattar belgilendi. Sondaı-aq polısııa qyzmetkerleri tarapynan zańsyz is-áreketterdi boldyrmaý úshin barlyq ustalǵandar sot-medısınalyq saraptamadan ótkizilip, osydan keıin ǵana qamaýǵa alý sharalary qabyldandy. Qazir 22 adam qamaýdan bosatyldy, onyń ishinde tergeý organynyń ótinishimen áleýmettik jaǵdaıy men densaýlyq jaǵdaıyna baılanysty, 2 áıel jáne 1 er azamattyń bas sharasy jeńil túrine, ıaǵnı úıqamaqqa ózgertildi, – dedi departament bastyǵynyń orynbasary.
Dúrbeleńdi paıdalanyp, lombardtan jalpy quny 300 mln teńge bolatyn altyn buıymdar, ańshylyq dúkeninen 6 mln 212 myń teńgeniń zattaryn jymqyryp ketkender de anyqtalyp otyr. Kúdikti retinde Qyzylorda qalasynyń 5 turǵyny ustalyp, qamaýǵa alynǵan.
Qazir О́zindik qaýipsizdik basqarmasyna azamattardan polısııa organdary qyzmetkerleriniń áreketine qatysty túsken 25 aryz boıynsha tekserý jumystary júrgizilýde.
Departament bastyǵynyń orynbasary turǵyndardy sabyr saqtap, tergeý organynyń áreketine túsinistikpen qaraýǵa shaqyrdy. Barlyq tergeý áreketteri zań sheńberinde jáne tolyq júrgiziletinine sendirdi.
QYZYLORDA
