Usynylǵan málimet boıynsha bıyl qalada 300 shaqyrym jol jóndelip, asfalt jol úlesi 67,4 paıyzǵa jetedi.
«2022-jyly 141 nysanǵa qurylys, jóndeý jumystaryn atqarýdy josparladyq. Atap aıtqanda 19 nysanda, ıaǵnı 51,5 shaqyrym jolǵa qurylys jáne qaıta jańartý jumystary júrgiziledi. 223,8 shaqyrym bolatyn 291 kóshe ortasha jóndeýden ótse, 19,3 shaqyrym jolǵa kúrdeli jóndeý jumystary júrgiziledi», dedi basqarma basshysy.
Sonymen qatar, 150 orynǵa aıaldama ornatý jáne aýdan ákimshiligi tarapynan bekitilgen kóshelerge shaǵal tas tóseý josparlanýda.
2021 jyly avtomobıl joldary salasynda 137 nysanda (189,7 shq) jóndeý jumystary aıaqtalǵan. Nátıjesi boıynsha qaladaǵy asfalt joldardyń úlesi 63,6% jetken. Asfalt joldar úlesin 2022 jyly 67,4%, 2023 jyly 71,2%, 2024 jyly 75%, 2025 jyly 79%-ǵa deıin jetkizý josparlanýda.
Shahar basshysy joldardyń qurylysy óziniń jiti baqylaýynda bolatynyn aıtyp, barlyq kemshilikterdi aldyn ala anyqtap, joıý kerektigin eskertti.
«Qurylys-montajdaý jumystaryn atqarý kezinde kemshilikterge jol berilmeý qajet. Ondaı qatelikter oryn alǵan jaǵdaıda merdiger, tehnıkalyq jáne avtorlyq qadaǵalaýshy mekemelerge aıyppuldar salynatyn bolady», dedi qala ákimi.
Sóz sońynda ákim sala jetekshisine avtomobıl joldarynyń sapasyn arttyrý boıynsha birqatar tapsyrmalar berdi.
