Plastıkten qutylý – álemdi alańdatqan másele. Al bul tyǵyryqtan shyǵýdyń joly – eko-dorba. Shúberekten tigilgen dorbaǵa azyq-túlik salsań da, asaı-múseıińdi salsań da bolady. Kezinde sol shúberek dorbany arqalap-aq kerek-jaraǵymyzdy jetkizip alatyn edik. Sol ýaqytta shashylyp jatqan sellofan kórmeıtinbiz, ras. Qazir ǵoı, dúkennen alǵan judyryqtaı zatty da polıetılen paketke tyqpyshtap, qolǵa ustatady.
Jýyqta ekologııaǵa tóngen qaýipti azaıtý maqsatynda A.S.Pýshkın atyndaǵy kitaphananyń Maker Space shyǵarmashylyq alańynda «Eko sómke tigemiz» atty sheberlik sabaǵy ótti. Sheberlik sabaǵy shúberekti pishý jáne tigý kýrsy negizinde uıymdastyryldy.
– Bizdiń sheberlik sabaǵymyz qorshaǵan ortany qorǵaýǵa baǵyttalǵan. Biz sheberlik sabaǵynda eko sómkeni eń ońaı jolmen jasaýdy kórsettik. Bul kúni qala turǵyndary kitaphanaǵa kelip, matadan eko sómke tigip alyp jatty, – deıdi kıim dızaıneri Jannur Baqyt.
Mundaı múmkindikti qalalyqtar qalt jibermeýge tyrysty. Sheberlik sabaǵyna kelgender óz talǵamdaryna saı qyzyldy-jasyldy dorba tigip, máz boldy.
– Turǵyndardyń bári bazarǵa barǵanda dorbalaryn ala barsa, polıetılen pakettiń keregi de bolmaıdy. Bul degenimiz – erteńgi kúni aınalamyzda shashylyp jatqan paketti azaıtamyz. Meniń oıymsha, bul – úlken jobanyń bastamasy. Dorba tigý bolmashy dúnıedeı kóringenimen, qorshaǵan ortanyń lastanbaýyna úlken septigin tıgizedi, – deıdi sheberlik sabaǵyna qatysqan qala turǵyny Aıaýjan Ýteýlınova.
Ánekı, qarapaıym qol dorbanyń paıdasy qandaı?! Tabıǵatqa paıdamyz tımese de, zııanymyzdy tıgizbeýdiń joly bul. Endeshe, el bolyp, dúkenniń polıetılen paketinen bas tartýymyz kerek shyǵar. Múmkin bolsa, árıne...
О́SKEMEN
