Máselen, Qostanaı oblysynyń turǵyndary byltyr maýsym aıynan beri iske asyryla bastaǵan memlekettik shyǵarmashylyq tapsyrys jobasynyń ıgiligin kórip otyr. Jobaǵa áý basta ata-ana da, bala da onsha ynta bildire qoımap edi, jyl sońyna qaraı san túrli ónerge baýlıtyn tegin úıirmelerge baryp, talabyn ushtap júrgen balǵyndardyń sany 2 myńǵa jetti. Bıyl aıtýly jobanyń aýqymy budan da keńeıe túsetin syńaıly.
– Byltyr tegin úıirmelerdiń jumysyn qamtamasyz etýge oblystyq bıýdjetten 77 mln teńge qarjy jumsaldy. Bul – kópshiliktiń tegin úıirmelerdiń ashylyp jatqanynan áli habardar bola qoımaǵan kezi. Esesine bıyl memleket qarjylandyratyn shyǵarmashylyq ortalyqtarǵa degen suranys edáýir artty. Osyǵan oraı, 600 mln teńgege tapsyryp berdik. Jyl basynda 300 mln teńge bólindi. Endi el suranysyn eskere otyryp, aldaǵy ýaqytta taǵy da tapsyrys beriledi. Oǵan oblys bıýdjetiniń múmkindigi jetedi, – dedi oblystyq mádenıet basqarmasynyń basshysy Erlan Qalmaqov.
Basqarma basshysynyń aıtýynsha, balany shyǵarmashylyq úıirmege bergisi kelgen ata-analar artsport.edu.kz biryńǵaı portaly arqyly ózderi turyp jatqan mekenjaıǵa jaqyn ári yńǵaıly úıirmeniń baǵytyn, ornyn anyqtap, oǵan elektrondy túrde ótinim bere alady.
Búginde óńirde shyǵarmashylyq memlekettik tapsyrys aıasynda bes myńǵa jýyq bala tegin úıirmege baryp júr. Mysaly, oblys ortalyǵynyń ózinde ǵana 3243 bala tegin úıirmede talabyn ushtaýǵa múmkindik alyp otyr. Al Arqalyqta – 591, Lısakovta – 156, Tobylda – 154, Rýdnyıda – 179, Jitiqarada – 227, Qarabalyqta 93 bala memleket qarjylandyratyn úıirmelerge baryp júr.
Aldaǵy ýaqytta, ásirese, aýyl balalaryn shyǵarmashylyqqa kóptep tartý maqsatynda Qostanaı, Altynsarın, Naýyrzym aýdandaryndaǵy mádenıet oshaqtarynda ulttyq óner ortalyqtarynyń jumysyn jandandyrý qolǵa alynbaq.
Qostanaı oblysy
