Mınıstrdiń sózinshe bıyldan bastap UBT tapsyrýshyny test barysynda bir emes eki kamera qadaǵalaıdy.
«Ulttyq biryńǵaı testileýdi bıyl da elektrondy formatta ótkizýimiz qajet. Ashyqtyqty, ádildikti qamtamasyz etý – basty mindettiń biri. Bıyl jańa tetikter de engiziledi. Onyń ishinde qosymsha kamera bolady. Iаǵnı, endi bir kamera emes, 2 kamera bir test tapsyrýshyǵa arnalyp qoıylady. Bir kamera talapkerdiń test tapsyrý barysyn qadaǵalasa, ekinshi kamera sol adamnyń ózi otyrǵan-otyrmaǵanyn belgilengen ýaqyttyń ishinde sýretke túsirip, tirkeıdi. Testileýdiń basynan aıaǵyna deıin basqa adam emes testi tapsyrýshynyń ózi otyrǵanyn baqylaıdy. Fist Id fýnksııasy bar arnaýly kamera bolady. Sondyqtan osy josparlardy tıisti deńgeıde oryndaý qajet», dedi Ashat Aımaǵambetov.
Sondaı-aq ol aqpan aıynda tapsyrylatyn testtiń mańyzyna toqtaldy.
«Bul – bizde jyl saıyn dástúrli formatta ótkiziletin testileý. Bıyl ony aqpan aıynyń sońyna deıin jalǵastyramyz. О́tinish bildirgen barlyq azamat osy testini tapsyryp úlgerýi kerek. Bul mindetti grantty alýǵa baǵyttalǵan test emes. Muny keıbir azamattarymyz daıyndyq retinde qaraıdy. Basqalary joǵary oqý oryndaryna aqyly túrde túsý úshin tańdaıdy, oǵan sertıfıkaty jaramdy. Qalaı desek te, bul testileý túlekterimiz úshin mańyzdy. Sondyqtan osy jumysty tıisti deńgeıde júrgizýimiz kerek», dedi Ashat Aımaǵambetov.
