Múgedekterge – múmkindik

Sal aýrýlaryna shaldyqqan azamattardy qoldaý ortalyǵy «Parasatty ómir» baǵdarlama­synyń tusaýyn kesti. Baǵdarlama aıasynda ortalyq tórt bólme ashqan. Emdeý-shynyqtyrý bólmelerinde múmkindigi shekteýli azamattar taǵdyrlas adamdarymen pikirlesip, áńgimelesedi. Bul bólmelerde arnaıy dáriger-reabılıtolog, dáriger-nevrapotolog qyzmet kór­setedi. Relaksasııa bólmesi júıke júıesin tynyshtandyratyn zamanaýı quraldarmen, sporttyq-deneshynyqtyrý bó­l­mesi elektrli velotrenajer, vertıkalızatormen jabdyqtalǵan. Ortalyqta ınvataksı qyzmeti jumys isteıdi. Qazir eki kólik bar. Invataksı qyzmeti múmkindigi shekteýli jandardyń qala ishinde júrip-turýyna qolaıly. Ortalyq qyzmetkerleri osyndaı arnaıy jabdyqtalǵan taǵy bir kólik bolsa deıdi. Sonda bul kóliktiń qyzmetin paıdalanýshylardyń suranysyn anaǵurlym qamtamasyz etýge múmkindik týmaq. Bul jerde jattyǵý tegin. Sonymen birge, ortalyqta qoǵamdyq qabyldaý, áleýmettik qyzmetter bólimi, «D.A.R» eriktiler klýby jumys isteıdi. Qajet bolsa logoped, zańger, psıholog qyzmetteri de uıymdastyrylady. Aqtóbe qalalyq sal aýrýlardy qoldaý qoǵamy dırektorynyń orynbasary Gúlmıram Srajovanyń aıtýynsha, atalǵan baǵdarlama múmkindigi shekteýli azamattardy ońaltýǵa, ómirge qaıta oralýyna baǵyttalyp otyrǵan kórinedi. Satybaldy SÁÝIRBAI,  «Egemen Qazaqstan». Aqtóbe oblysy.