Qańtar aıynda qala basshysy Eńbekshi aýdanynyń shalǵaı jatqan 16 eldi meken turǵyndarymen júzdesip, olardyń ótinishterin tyńdaǵan. Kezdesýler barysynda aýyl bıleri men turǵyndar tarapynan 47 ótinish pen túrli máseleler kóterildi. Olardyń 27-ne kezdesý barysynda naqty jaýaptar berilgen bolsa, qalǵan 20 máselelerdi sheshý úshin tıisti is-sharalar bekitilgen bolatyn.
Búgingi kúnge joǵaryda atalǵan 20 máseleniń 7-eýi sheshimin tapty. Atqarylǵan jumystar jóninde aýdan ákimi Dosbol Esilbek baıandady.
«Qaratóbe aýmaǵyndaǵy jol boıynsha «Álem TransJol» JShS merdiger mekeme anyqtalyp, Jastar kóshesinde aýa raıynyń qolaılyǵyna oraı jumystar bastalady. Al, «Bazarqaqpa» turǵyn alabyndaǵy elektr jelilerdi jańartý úshin «OńtústikJaryqTranzıt» JShS-i ınvestısııalyq baǵdarlamasyna engizildi. Jumystar aǵymdaǵy jyly júrgiziledi. Sonymen qatar, «Bazarqaqpa» turǵyn alabynda ornalasqan 9 kóp qabatty turǵyn úılerdi káriz júıelerine qosý úshin aǵymdaǵy jóndeý jumystaryn júrgizýge qajetti smeta qujattary ázirlenip, bıýdjettik naqtylaýyna usynystar engizildi», dedi aýdan ákimi.
Kezdesýde kóterilgen «Toǵys» turǵyn alabyndaǵy transformatorlardyń qaýipsizdik qorshaýlaryn júrgizý boıynsha «Ońtústik JaryqTranzıt» JShS-i apatty turǵan transformatordy jóndep, qorshaýlaryn ornattty. Al, Maıatas, Eltaı, Jylanbuzǵan, Aınatas eldi mekenderdiń ortalyq kóshelerine aıaldama ornatý úshin qoıylatyn jerleri belgilenip, ornatý jumystary júrgizilýde. Jumystar osy aıdyń sońyna deıin tolyq aıaqtalady. Sonymen qatar, «Qazyǵurt» mádenıet úıinen sport jáne óner úıirmelerin ashý úshin ınvestor arqyly jumys júrgizý sheshimi qabyldanǵan.
Aýdan ákimi qalǵan ótinishterdiń oryndalýy boıynsha tıisti jumystar júrgizip jatqanyn jetkizdi.
Ashyq dıalog formatynda ótken kezdesýde aýdanǵa qatysty barlyq máseleler kóterilip, alda atqarylatyn jumystar talqylandy. Aýyl bıleri aǵyn sý, sapaly ınternet pen ortalyq kóshege beınebaqylaý kamerasyn ornatýdy jáne «Badam» ózeni jaǵalaýlaryna betondy damba qoıyp, bekitý jáne abattandyrý jumystaryn júrgizýdi, qosymsha mektep salý máselesin aıtty.
Qala ákimi árbir belsendiniń qozǵaǵan máselesin muqııat tyńdap, suraqtarǵa jeke-jeke jaýap berdi. Halyqtyń ótinishi oryndalatynyna senim bildirip, árbir másele kezek retimen sheshimin tabatynyn aıtyp túsindirdi.
Turǵyndardyń ótinishi boıynsha sala jetekshilerine naqty tapsyrma júktelip, oryndalýyn baqylaý úshin hattamaǵa engizildi.
