Bizder onyń «Qan men terin» oqyp, kórkem ádebıettiń qudiretin túısinip, shyǵarmashylyq ónerdiń jankeshti eńbek pen ymyrasyz kúresten turatynyn kórip, jańa túsinikpen ádebıetke kelgen urpaqtyń ókilderimiz.
Ábekeń ádebıettiń shynshyldyǵyn, shynaıylyǵyn, stıldik tazalyǵyn talap etti, qalamgerdiń haqysy úshin kúresti, ár shyǵarmasy úshin, ár sóılemi úshin kúresti. О́ziniń shyǵarmashylyǵyna dál mundaı erekshe jaýapkershilikpen qaraıtyn jazýshy kemde-kem shyǵar. Tipti bireýdiń shyǵarmasyn oqyǵanda da qolyna qalam alyp, astyn syzyp, unaǵan jerine «unady» dep, unamasa, «unamady» dep jazyp otyratyn yjdaǵattylyǵyn qaıtersiz! Toqsannan asqan shaǵynda da jazýyn doǵarǵan emes. Áldeqalaı sálem berý úshin úıine bara qalsań, seni otyrǵyzyp qoıyp, jazyp jatqan zatyn uzaq oqyp, samoletten qalyp baram degenińdi tyńdamaıtyn kezin talaı kórdik.
Aıtyp-aıtpaı ne kerek, ádebıetimizdi álemge tanytqan uly tulǵa dúnıeden ótti. Aldymyzda asqar taýdaı bolyp turýshy edi. Kóńil shirkin qııa almaıdy. Dúnıeniń ótkinshiligin aıtyp, zarlanýǵa qudaıdan qorqyp otyrmyz. 98 degen jas, bir qarasań, arman sekildi. Ábekeń – shyn máninde armanyna jetken adam. Halyqtyń altyn qazynasyna qosylatyn shyǵarmalardy týdyrý, elińniń táýelsizdigin kórý, halyqtyń maqtanyshyna aınalý, ystyq yqylasyna bólený, ǵasyrǵa jýyq jemisti ǵumyr keshý – budan artyq qandaı baqyt bolýy múmkin!
Qosh, qaıran Ábeke! Barsha qazaq halqyna, marqumnyń artynda qalǵan urpaǵyna amandyq tilep, kóńil aıtamyn!
Tólen ÁBDIK,
Memlekettik syılyqtyń laýreaty
