Byltyr 287 bala ınfeksııalyq stasıonarda em alǵan. Daýasyz dertke dýshar bolǵandar arasynda júkti áıelder de az emes.
– Oblys boıynsha 23 bala stasıonarlyq aýrýhanalarda em qabyldap jatyr, – deıdi oblystyq kópbeıindi balalar aýrýhanasynyń bas dárigeri Serikjan Sabyrálıev, – tósektik oryn 80 paıyzǵa tolyq. Aýrýy ortasha dárejedegi balalar emdelýde. Bir dátke qýaty, aýyr jaǵdaıdaǵy balalar joq.
Bas dárigerdiń aıtýyna qaraǵanda, ótken jylmen salystyrǵanda balalardyń koronavırýs indeti birshama jeńil ótýde eken. Osyǵan deıin talaı eskertilgen jaıǵa qulaq asqan jón. Ekpeniń tıimdi ekendigin vaksına alǵan balalardyń birde-biri aýyrmaǵanynan ańǵarýǵa bolady. Vaksına almaǵan balalar arasynda aýrý kóp, asqyný da bar. Jeti bala aýrýy asqynyp túsken.
Osy arada sanıtarlyq talaptardy saqtaý qajettigin taǵy bir qaıtalap aıtsaq, artyqtyǵy bolmas. Oblys ortalyǵyndaǵy Viamedis seriktestigi ambýlatorııalyq emhanalyq bóliminiń jetekshisi Gúlnazııa Zulqarnaevanyń aıtýyna qaraǵanda, tumaý belgileri bar adamdar úshin arnaıy súzgi bólmeleri jabdyqtalǵan. Bul jerde feldsherler jumys istep, naýqastardaǵy ınfeksııa belgilerin tekseredi. Mamandardyń pikirinshe, óńirde koronavırýstyń shtamyn túbegeıli anyqtaý qıyndyq týǵyzyp otyr. Zerthanalyq taldaý respýblıkalyq deńgeıde ǵana júrgiziledi ári ótken jylmen salystyrǵanda qazirgi shtamm basqa. Máselen «delta» shtamy kúrdeli asqynýlarmen ótken bolsa, «omıkron» shtamy birshama juqpaly bolǵanymen áldeqaıda jeńil. Qalaı bolǵan kúnde de sanıtarlyq talaptardy buljytpaı oryndaǵan lázim. Saqtansań saý bolasyń degen sózdiń shyndyǵyna kóz jetkeli qashan?!
Aqmola oblysy
