Qos beldik te ózimizde

Jergilikti Adal Promotions kompa­nııasynyń uıymdastyrýymen ótken Aqtaýdaǵy dúbirli dodada joǵaryda atap ótken boksshylardan bólek, birqatar jerlesimiz ózderiniń reıtıngtik kezdesýlerin ótkizdi. Boks keshiniń shy­myldyǵyn qazaqstandyq boksshylar Joldas Jeńisov (2-0, 1 KO) pen Aıdos Tastaev (1-2, 1 KO) ashty. 4 raýndtyń qorytyndysy boıynsha J.Jeńisov upaı sanymen jeńiske jetti. Ekinshi jekpe-jekte sharshy alańǵa kóterilgen qazaqstandyq Murat Qydyráli (0-1) ózbekstandyq debıýtant Bogdan О́te­gen­ovten upaı sany boıynsha jeńilip qaldy. Tórt raýndqa josparlanǵan aıqasta tóreshiler jeńisti biraýyzdan О́tegenovke berdi. Úshinshi kezdesýde eki qazaqstandyq boksshy Ilıa Medıanık (2-0-1, 0 KO) pen Arman Nurasylov (2-0, 1 KO) sharshy alańda qolǵap túıistirdi. Ekinshi orta salmaqtaǵy kezdesýde tóre­shiler teń esep tirkedi – 58-56, 56-58, 57-57.

Sonymen qatar jýyrda ǵana elorda tórinde Táýelsizdik kúnine oraı uıym­dastyrylǵan boks keshinde óner kórsetip, jeńiske jetken orta salmaq­taǵy Saparbaı Aıdarov (7-0, 2 KO) bul joly da óz jankúıerlerin qýantty. Alty raýndqa josparlanǵan básekede ol reseılik Davıd Nıkolaevtan (9-9-1, 5 KO) tóreshilerdiń sheshimimen basym tústi.

Al araǵa birneshe jyl salyp rıng­te boı kórsetken qazaqstandyq Bekman Soılybaev (14-1, 4 KO) ta kórer­menderdi jarqyn jeńisimen qýantty. Meksıkalyq Elıot Chavespen (10-4-1, 6 KO) kezdesken ol segizinshi raýndta qarsylasyn nokaýtqa túsirip, boks keshi­ne jınalǵandarǵa tamasha kóńil kúı syılady. Bul – osy keshtegi jalǵyz nokaýtpen aıaqtalǵan kezdesý boldy.

Reıtıngtik kezdesýler óz máresine jetken soń, kezek negizgi jekpe-jekterge keldi. Áýesqoılar arasyndaǵy álem chempıony Bekzat Nurdáýletov kásipqoı rıngtegi tórtinshi kezdesýin 23 jastaǵy Nıderland ókili Chıko Kýasımen ótkizdi. Qarsylasy búginge deıin sharshy alańda alty jekpe-jek ótkizip, sonyń beseýinde jeńiske jetken. Bir kezdesýi teń eseppen aıaqtalǵan tájirıbeli boksshy edi. 10 raýndtyq formatta WBO Youth beldigi sarapqa salynǵan tartysty aıqasta B.Nurdáýletov tehnıkalyq nokaýtpen jeńiske jetip, karerasyndaǵy alǵashqy beldigine qol jetkizdi.

Al osy keshtiń basty jekpe-jeginde jerlesimiz Meıirim Nursultanov (16-0, 8 KO) pen reseılik Andreı Sırotkınmen (19-1-1, 7 KO) orta salmaqta bos turǵan WBO International beldigi úshin judy­ryqtasty. 36 jastaǵy reseılik Andreı Sırotkın buǵan deıin 21 márte sharshy alańǵa kóterilip, 19 ret jeńiske jetken. Jeti básekede aıqyn basymdyq tanytty. Bir ret utylyp, taǵy bir kezdesýde teń esep tirkeldi. Osydan tórt jyl buryn ol álemniń eks-chempıony Rıkardo Maıorgany utqan bolatyn. 10 raýndqa jos­parlanǵan kezdesý aıqastyń bel ortasynda merziminen buryn máresine jetti. Otandasymyzdyń besinshi raýnd­taǵy aýyr soqqylarynan keıin Sırotkın jekpe-jekti jalǵastyrýdan bas tartyp, jeńilgenin moıyndady. Osylaısha, Meıirim Nursultanov WBO International beldiginiń ıegeri atandy.

Bul otandasymyzdyń kásipqoı bokstaǵy 16-shy jeńisi. 2016 jyldan beri kásipqoı rıngte judyryqtasyp kele jatqan Meıirim osy ýaqyt aralyǵynda 15 márte sharshy alańǵa kóterilip, bar­lyǵynda jeńiske jetti. Segiz básekeni merziminen buryn aıaqtaǵan edi.