– Shaıbaly hokkeı jankúıerleri tórt jyldan beri taǵatsyzdana kútken Olımpııa oıyndaryndaǵy hokkeı básekelerin tamashalaýda. Al biz osy úzilisti tıimdi paıdalanyp, QHL-dyń mańyzdy bóligin ótkizýge daıyndalyp jatyrmyz. О́zderińizge belgili, qańtar aıynda kóp komanda oıynshylarynan koronavırýs tabylyp, birqatar matchty keıinge shegerip, oıyndardy merziminen buryn toqtatýǵa májbúr bolǵan edik. Birer kún buryn QHL-dyń dırektorlar keńesi Reseı hokkeı federasııasynyń basshylyǵymen kelise otyryp, turaqty birinshilik komandalary men jankúıerlerine yńǵaıly bolý úshin bıylǵy maýsymdy merziminen buryn aıaqtaýǵa sheshim qabyldady. Al naýryz aıynan bastap Gagarın kýbogy jolyndaǵy pleı-off básekeleri jalǵasady.
QHL prezıdenti Alekseı Morozov turaqty birinshiliktiń merziminen buryn aıaqtalýyna birneshe sebep áser etkenin aıtady. Árıne, onyń eń alǵashqysy eki jyldan beri jalǵasyp kele jatqan koronavırýs pandemııasy. Chempıonattyń qalǵan matchtarynda da oıynshylardyń indet juqtyrý qaýpi bar ekenin eskerip, jarysty toqtatqan.
– Gagarın kýbogy básekeleri bastalǵanǵa deıin barlyq komandanyń oıynshylary óz komandalarynda karantınge jatqyzylady. Al pleı-off oıyndary kúnara ótkiziledi. Iаǵnı jarystyń alǵashqy kúni «Batys» jáne «Shyǵys» konferensııasynyń eki-eki komandasy, araǵa bir kún salyp qalǵan klýbtar muzaıdynǵa shyǵady. Aradaǵy bir kúndik demalys indetke shaldyqqan oıynshylardyń ornyna basqa hokkeıshilerdi qosýǵa múmkindik beredi.
– Lıga turaqty chempıonattyń nátıjelerin eskere otyryp, pleı-offqa shyqqan komandalardy anyqtaý maqsatynda túrli nusqalardy qarastyrdy. Bul jerde eń mańyzdysy – kóp oıyn ótkizgen jáne az matchqa qatysqan komandalarǵa birdeı múmkindik berý boldy. Sóıtip sońynda barshaǵa ortaq bir nusqaǵa toqtaldyq. Iаǵnı komandalardyń jınaǵan upaı sandarynyń paıyzyna qaraı úzdik 16 komandany anyqtap aldyq. Bul nátıjelerdi bekitýdiń tanymal jáne álemdik dáleldengen tájirıbesi. Muny shetelde de, Reseıde de qoldanady.
Turaqty birinshilik oıyndary ýaqytsha toqtaǵanǵa deıin, elordanyń «Barysy» chempıonattyń «Shyǵys» konferensııasyndaǵy týrnır kestesinde 8-orynǵa turaqtaǵan bolatyn. Jerlesterimizdiń enshisinde 47 matchtan keıin 48 upaı bar. «Barys» osy nátıjesiniń arqasynda pleı-off kezeńine tikeleı joldama alady. Qazaqstandyq komanda Gagarın jolyndaǵy kýboktyń alǵashqy oıynyn «Shyǵys» konferensııasyndaǵy týrnır kestesinde birinshi orynda turǵan «Metallýrg» komandasymen kezdesedi. Match 1 naýryz kúni Magnıtogorskide ótedi.
Aıta keteıik, Beıjińde ótip jatqan Qysqy Olımpııa oıyndarynyń hokkeı básekelerinde QHL-dyń 22 klýbynda óner kórsetetin 120 hokkeıshi óz quramalarynda baq synap jatyr. Reseı men Qytaı quramalarynyń túgeli derlik QHL oıynshylarynan jasaqtalǵan. Al Latvııa, Chehııa jáne Fınlıandııa komandalarynyń jartysyna jýyǵy QHL-da oınaıtyn hokkeıshiler.
