tengrinews.kz tartatqan aqparatqa súıensek, Shardaradaǵy aýdandyq polısııa bólimine birneshe mektep shottarynan, durysy muǵalimderdiń jalaqysynan basqa shotqa iri somadaǵy qarjyny zańsyz aýdarý deregi boıynsha habarlama túsken.
«Jedel-izdestirý is-sharalary nátıjesinde tártip saqshylary alaıaqtyń shoty men kúdiktiniń jeke basyn anyqtaǵan. Onyń Almatyda ekeni belgili boldy. Shardara aýdandyq polısııa bóliminiń qyzmetkerleri alaıaqty ustap, ony aýdandyq polısııa bólimine jetkizdi», delingen habarlamada.
Kúdiktiniń buryn qarjy salasynda jumys istegeni anyqtalǵan. Ol ótken jyly jumysynan bosap, Almatyǵa at basyn burǵan.
Keıin jeke derekterdi paıdalanyp, 40-tan asa muǵalimniń jalaqysyn óz shotyna aýdaryp alǵan. Jábirlenýshilerge keltirilgen zalaldyń jalpy somasy 17 mıllıon teńgeden asyp jyǵylǵan. Kúdiktiden 1,5 mıllıon teńge tárkilendi», delingen habarlamada.
Derek qylmystyq kodekstiń «Alaıaqtyq», ıaǵnı, 190-baby boıynsha tirkeldi. Kúdikti qamalǵan.
