Arnaıy prokýrorlar qyzmeti basshysynyń sózine zer salsaq, qazirgi kezge deıin qylmystyq toptyń 18 múshesi quryqtalǵan, 21 adamnyń adam óltirý, urlyq, tonaý boıynsha sottylyǵy bar eken.
«Ol sanatta «Dıkıı Arman» degen laqap atymen tanymal bolǵan Arman Jumageldıev pen onyń tobynyń músheleri de bar.
Qarý ustaǵan onyń adamdary kezdeısoq ótip bara jatqan turǵyndardyń arasynan 24 azamatty urlap, kúshtep ustaǵany anyqtaldy. Azamattardy bir jerden ekinshi jerge aparyp, uryp-soqqan, saldarynan bir adam kóz jumǵan. Budan bólek, qaraqshylar 12-shi qalalyq aýrýhanada qatty soqqyǵa jyǵylǵan polıseıdiń qyzmettik qarýyn alyp ketken», dedi Rızabek Ojarov Ortalyq kommýnıkasııalar qyzmetinde ótken baspasóz máslıhatynda.
Ol atalǵan fakt boıynsha qylmystyq is tergelip jatqanyn jetkizdi.
«Áleýmettik jelilerde Jumageldıev bosatyldy nemese belgisiz jaqqa jetkizildi degen túrli boljamdar men jalǵan aqparattar tarady. Is qosymsha tergeý úshin arnaıy prokýrorlarǵa jiberildi. Biz ony UQK ýaqytsha ustaý ızolıatoryna aýystyrdyq. Ol sonda qamaýda otyr», dedi Arnaıy prokýrorlar qyzmetiniń basshysy.
