6 aqpandaǵy derekke súıensek, aımaqta 345 adam koronavırýsqa shaldyqqan. Al 613 naýqas aýrýynan aıyǵypty. Jalpy, sońǵy aptada óńirdegi epıdemııalyq ahýaldyń turaqtalǵany baıqalady. Áıtse de arqany keńge salýǵa bolmas. Oblystaǵy emdeý mekemelerinde tósektik oryn sany, dári-dármek qory, medısına qyzmetkerleri jetkilikti me?
Oblystyq densaýlyq saqtaý basqarmasynyń basshysy Aıdar Seıitqazınovtiń aıtýynsha, óńirde «Omıkron» resmı túrde tirkelmegen. Jergilikti PTR-taldaý zerthanalary koronavırýs ınfeksııasynyń bar-joǵyn ǵana anyqtaýǵa qaýqarly. Onyń «Delta» nemese «Omıkron» ekenin rastaıtyn múmkindik joq. Taldamalar Almaty qalasyndaǵy zertteý ortalyqtaryna joldanady eken.
– Aımaǵymyzda medısınalyq qyzmetkerlerdiń, dári-dármekterdiń, apparattar men tósektik oryndardyń sany jetkilikti. Jaǵdaıdyń odan ári ýshyǵýy múmkin ekenin eskerip, birneshe shara josparyn daıyndadyq. Máselen, qaýipti indetti juqtyrǵandar sany kúrt ósse, oblys aýmaǵyndaǵy 4 myńǵa jýyq tósektik orynnyń barlyǵyn jumyldyramyz. Qazirgi ýaqytta tek 1 280 oryn ashyldy, onyń 42 paıyzy tolyq. Reanımasııalyq 130 orynnyń 16 paıyzynda naýqastar em qabyldaýda, – deıdi A.Seıitqazınov.
Jyl basynan beri qaýipti indetti juqtyrǵan balalar sany aıtarlyqtaı kóbeıgeni baıqalady. Qańtar aıynyń alǵashqy kúnderi shamamen 10 bala stasıonarlyq jaǵdaıda em qabyldasa, búginde 70-ten asa jetkinshek aýrýhanalarǵa jatqyzylǵan. Taǵy 170-ten asa jasóspirim ambýlatorlyq túrde dárigerlerdiń baqylaýyna alynǵan.
Qaýipti keselmen kúreste medısınalyq mekemelerdiń jumysy saıabyrlaǵan emes. Ǵ.Sultanov atyndaǵy oblystyq aýrýhananyń juqpaly aýrýlar ortalyǵynyń mamandary adamdardyń ómirin qaterli aýrýdan arashalap qalýǵa baryn salýda.
Qysqa merzimde salynyp, ótken jyldyń kúzinde paıdalanýǵa berilgen modýldik juqpaly aýrýlar gospıtalinde Covid-19 dertine shaldyqqan naýqastardy emdeýge barlyq jaǵdaı jasalǵan. Juqpaly aýrýlar ortalyǵynyń bólim meńgerýshisi Qymbat Qazkenovanyń aıtýynsha, byltyr modýldik ortalyqta 4 712 naýqas KVI-den emdelip shyqqan. Jyl basynan 248 adam zamanaýı aýrýhanada em qabyldaǵan. Ortalyqta qazir 155 naýqas em qabyldaýda. Jansaqtaý bóliminde 11 naýqastyń biri ókpeni jasandy tynys aldyrý apparatyna qosylǵan. Táýliktik júkteme – shamamen 15-20 adam. Munda 20 oryndyq jansaqtaý bólimshesi, kishi operasııalyq bólme, PTR-taldaýlarǵa arnalǵan zerthana, ekspress-zerthana, kompıýterlik tomografııa, rentgenografııa, ÝDZ, elektrokardıografııa jáne bronhoskopııa kabınetteri jumys isteıdi.
– Dertten saqtanýdyń birden-bir joly ekpe salǵyzý bolǵandyqtan, árbir adam sanaly túrde vaksınalaý men revaksınalaýdan ótýi tıis. KVI-den emdelip shyqqandarǵa úsh aıdan soń ekpe alýǵa ruqsat etiledi. Revaksınalaý úshin eresekter «Spýtnık Laıt» vaksınasyn salǵyzsa, 60 jastan asqandar, jasóspirimder men júkti áıelder Pfizer kompanııasynyń (AQSh) Comirnaty vaksınasyn salǵyzýy qajet, – deıdi Q.Qazkenova.
Elordadaǵy ahýal kúrdelense, ile-shala Pavlodar óńirindegi jaǵdaı ýshyǵa túsetini ras. Aımaqtar kórshi ornalasqandyqtan, aýrýdyń da «qydyryp júrýi» zańdylyq. Sol úshin turǵyndardyń sebepsiz qydyrmaýy qajet-aq.
Oralhan QOJANOV,
jýrnalıst
Pavlodar oblysy
