Adamdardyń úsip qalýy nemese sýyqtan kóz jumýy sııaqty tótenshe jaǵdaılarǵa jol berilse, bul jumys nátıjesiniń tómendigin kórsetedi. Áıteýir ázirge ondaı keleńsizdikke jol berilgen joq. Aýa raıynyń buzyla bastaǵanyn bilse bul qyzmet dereý SMS habarlamalar jiberip nemese «Dármen» qosymshasy arqyly adamdardy alys jolǵa shyǵýdan saqtandyra bastaıdy.
Osy ýaqytqa deıin 4 ret joldardy qar basýy bolyp, 3 ret qutqarý jumystary júrgizilgen. TJ qyzmetkerleri qarǵa batyp qalǵan 13 tehnıkany bosatyp, 38 adamdy qutqaryp qaldy. Sonyń ishinde Ýálıhanov aýdanynyń ortalyǵy Kishkenekól aýylynan 28 jeltoqsanda túngi on jarym kezinde Maı aýylyna qaraı shyqqan erli-zaıypty adamdardyń qar astynda qalǵany týraly dabyl túsken. Jedel shyqqan qutqarý toby olardy Maı aýylyna 15 shaqyrymdaı qalǵan jerde qalyń qarda turyp qalǵan jerinen tapty. Qalyń jaýǵan qar jeńil mashınany joldan adastyryp, aıdalada toqtatyp tastaǵan. Abyroı bolǵanda jolaýshylar úsýden aman eken.
31 qańtarda da tótenshe oqıǵa bolyp, Tımırıazev aýdanyndaǵy Aqsýat pen Ishım aýyldarynyń arasynda jaıaý shyqqan jigittiń joǵalǵan dabyly túsken. Abyroı bolǵanda aýyldar arasynda baılanys bar eken, jigit óziniń joldan adasqanyn telefonmen habarlaǵan. «Jedel shyqqan izdeý toby ony túngi saǵat 12-de tapty. Elý jastaǵy adam aman-saý, medısınalyq kómekke zárý bolmady, sondyqtan ol Aqsýattaǵy úıine jetkizildi», deıdi oblystyq TJ departamenti basshysynyń orynbasary Murat Qanǵojın.
Qys aılarynda adamdardyń ómirine qaýip tóndiretin bir sharýa –balyqshylyq. Ondaıǵa keıbireýler ashy sýdan tatyp alyp, kóńilderin kóterip te barady. Muzdyń qalyńdyǵyn bilmeı táýekelge baratyndar da osyndaılar. Árıne, Soltústiktiń qysynda muzdyń qalyńdyǵy qaýip týǵyza qoımas, biraq kóktem shyǵa muzdyń astynan erýi sebebinen ol juqaryp qalady. Osy jyldyń basynan beri elimizde qaýipti jaǵdaıda balyqqa shyqqan tórt adam sýǵa batyp ketti. Sonyń bireýi kámeletke tolmaǵan jasóspirim. Ondaıdan áıteýir Soltústiktiń balyqshylary aman.
Tótenshe jaǵdaı týdyratyn «jaýdyń» taǵy biri – órt. Bıylǵy, 2021-2022 jyly oblysta 195 ret órt bolǵan. Bul byltyrǵy sáıkes merzimmen salystyrǵanda 19 paıyzǵa az bolǵanymen qaýiptiń qateri zor. О́rttiń kesirinen 12 adam qaza tapty, 4 adam aýyr jaralandy. Bıylǵy materıaldyq shyǵyn da úlken, byltyrǵymen salystyrǵanda 2,6 ese artyq.
Soltústik Qazaqstan oblysy
