Jartylaı fınal
Týrnırdiń birinshi jartylaı fınalynda Reseı men Ýkraına quramalary kezdesti. Asa tartysty ótken básekede soltústiktegi kórshilerimiz 3:2 esebimen jeńiske jetip, fınalǵa birinshi bolyp joldama aldy. Matchtyń alǵashqy bóliginde reseılikter 2:1 esebimen alǵa shyqty. Ekinshi taımda Artem Nııazov Reseıdiń úshinshi golyn soqqanymen, arada 4 mınýt ótkende Danııl Abakshın esepti 3:2-ge deıin qysqartty. Oıynnyń sońǵy mınýtynda tóreshi Reseı quramasynyń qaqpasyna penaltı belgilep, ýkraınalyqtarǵa esepti teńestirýge zor múmkindik paıda bolǵan edi. Alaıda Petr Shotýrma aıyp dobyn sátsiz oryndap, komandasyn jeńilisten qutqaryp qala almady.
Ekinshi jartylaı fınalda Pıreneı túbeginiń eki ókili – Ispanııa men Portýgalııa fýtzalshylary sheberlik baıqasty. Bul match Portýgalııanyń tamasha kambegimen aıaqtaldy. Kezdesýdiń birinshi 20 mınýtynda ıspanııalyqtar 2:0 esebimen alǵa shyqsa da, ekinshi taımda Portýgalııa quramasy Ispanııa qaqpasyna jaýapsyz úsh gol salyp, qarsylastarynan jeńisti julyp aldy. Qorytyndy esep – 3:2. Oqyrmandardyń esinde bolsa, Ispanııa men Portýgalııa byltyrǵy álem chempıonatynyń shırek fınalynda da bir-birimen kezdesip, ol matchta da portýgalııalyqtardyń mereıi ústem bolǵan edi.
Úshinshi oryn
Eýropa chempıonatynyń qola júldesi úshin ótken matchta Ispanııa men Ýkraına kezdesti. Match aldynda fýtzal mamandary Ispanııany favorıt sanaǵan. Alaıda Ýkraına fýtzalshylary qarajaıaý emes ekendikterin kórsetip, alǵashqy taımda jeti dúrkin Eýropa chempıondaryna laıyqty qarsylyq kórsetti. Kezdesýdiń 11-mınýtynda ıspanııalyqtar esep ashsa, 17-mınýtta ýkraınalyqtar tarazy basyn teńestirip ketti. Arada bir mınýt ótkende Ispanııa qaıtadan esepte basymdyqqa ıe boldy. Tablodaǵy 2:1 esebi ekinshi taımnyń bel ortasyna deıin saqtalyp turǵanymen, 31 jáne 32 mınýttarda Pıreneı túbeginiń ókilderi Ýkraına qaqpasyna jaýapsyz eki gol soǵyp, Kári qurlyq birinshiliginiń qola júldesin jeńip aldy. Qorytyndy esep – 4:1.
Bul – Ispanııanyń Eýropa chempıonaty tarıhyndaǵy úshinshi qola júldesi. Olar buǵan deıin 2003 jáne 2014 jyldary úshinshi orynǵa taban tiregen. Al 1998 jáne 2018 jyldary eki ret fınalda súringen. Al Ýkraına fýtzalshylary óz tarıhynda eki ret (2001 jáne 2003 jyldary) fınalǵa shyǵyp, 2005 jyly tórtinshi oryn alǵan. Mine, bıyl olar ekinshi ret úzdik tórttiktiń qatarynan kórindi.
Fınal
2022 jylǵy Qurlyq dodasynyń fınalynda Reseı quramasymen sheberlik baıqasqan Portýgalııa fýtzalshylary tórt jyl burynǵy ataqtaryn saqtap, eki dúrkin Eýropa chempıony atandy. Bir qyzyǵy, portýgalııalyqtar fınalda da qarsylastarynan 0:2 esebimen jeńilip jatyp, kambek jasady. Kezdesýdiń birinshi kezeńinde reseılik Anton Sokolov (9-mınýt) pen Andreı Afanasev (12-mınýt) mergendigimen kózge tússe, 18-mınýtta Tomash Paký esep aıyrmasyn qysqartty. Ekinshi kezeńde Portýgalııa sapynan Andre Koelıý 26 jáne 31-mınýttarda dýbldiń avtory atansa, Panı Varela 39-mınýtta oıynnyń núktesin qoıdy. Osylaısha, Portýgalııa quramasy kambek jasap, Reseıden 4:2 esebimen basym tústi.
Portýgalııa quramasy 1996 jyly tusaýy kesilgen Eýropa chempıonatynyń fınalynda osymen úshinshi ret baq synady. 2010 jylǵy jarystyń fınalynda Ispanııadan jeńilse, 2018 jyly Slovenııada ótken chempıonatta dál osy Ispanııaǵa ese qaıtaryp, tuńǵysh ret Eýropa chempıony atanǵan bolatyn. Reseı quramasy bolsa, altynshy márte fınalda jeńildi. Olar tek 1999 jyly ǵana Qart qurlyq birinshiliginde top jarǵan edi. Sonymen qatar reseılikter úsh márte qola júldeni jeńip alǵan.
Úshinshi Eýropa chempıonatyna qatysqan Qazaqstan quramasy shırek fınalda jarys jolynan shyǵyp qalsa da, jerlesterimiz jekeleı nátıjede úzdik shyqty. Máselen, Birjan Orazov bıylǵy chempıonattyń úzdik surmergeni atansa, Dýglas nátıjeli pas berýde birinshi boldy. Orazov bıylǵy birinshilikte nebári 4 match ótkizse de, 7 gol soǵyp, áriptesterine 2 márte nátıjeli pas berdi. Toptyq kezeńde Slovenııa qaqpasyna 1 gol, Fınlıandııaǵa 2 gol, Italııaǵa 2 gol jáne 1\4 kezeńde Ýkraına quramasyna 2 gol saldy. Al eki pastyń bireýin toptyq kezeńde Fınlıandııamen bolǵan oıynda Arnold Knaýbqa, ekinshisin Ýkraınamen bolǵan oıynda Dýglasqa shyǵardy. Al Dýglas 4 oıynda 5 goldyń soǵylýyna jaǵdaı jasady.
Mergender tiziminde reseılik Antoshkın, Chıshkala, Sokolov syndy fýtzalshylar 5 goldan salyp, ekinshi orynǵa jaıǵasty. Orazov Eýroǵa alǵash ret qatysqan 2018 jyly toptyq kezeńde Polsha qaqpasyna soǵylǵan bir golmen shektelgen edi. 2016 jyl Serbııada ótken Eýroda qazaqstandyq Serik Jamanqulov, Rıkardınıý (Portýgalııa) jáne Aleks, Marıo Rıvılos, Mıgýlın (bári de – Ispanııa) syndy oıynshylarmen birdeı 6 gol salyp, birinshi orynda boldy. Al 2018 jyly Slovenııada bolǵan birinshilikte Rıkardınıý úzdik atanǵan edi. Ol 5 oıynda 7 gol salǵan bolatyn.
